Пайғамбарымыздың (с.ғ.с.) туған күнінде оны еске алып, адамзат баласына қалдырған өнегесін қастер тұтуды ескеріп, игі дәстүрге айналдырған №1 мешітінің қажы апалары биыл да мәуліт айының құрметіне қасиетті жұма күнінің қарсаңында хатым түсірді. Алла Елшісін (с.ғ.с.) еске алып, оның атына салауат айтылды. Мұхаммед (с.ғ.с.) өмір сүрген кезеңді тарихшылар «алтын ғасыр» немесе «құтты заман» деп атаған. «Алтын ғасырда» ардақты Пайғамбарымыздан (с.ғ.с.) жылу алған сахабалар сыпайы, нәзік, мейірімді болған. Көзбояушылық пен мал шашпақтан аулақ болып, әрбір істерін риясыз һәм ыждағатпен жасаған. Көпшілікке жомарттық жасап, қолғабыс тигізуге әзір тұрған. Осындай өнегелі өсиеттерін тағы бір қайталап, жадымызда жаңғыртқан ақ жаулықты аналармен бірге наиб имам Ермахан Оралбай қажы хатымның дұғасын бағыштап, еліміз бен жерімізге тыныштық тілеп бата жасады.