Барша мұсылман қауымды қуанта келген Құрбан айт мерекесін Қарағанды қалалық «Бала қажы» мешіті үлкен шаттықпен қарсы алды. Айт намазына жиналған қауымнан мешіт ішінде ине шаншар орын болмады. Ішке сыймаған халық, мешіт ауласында тұрып Айт намазын оқыды. Ер азаматтар мен қатар әйелдер қауымы да көптеп келген. Көңілді жадырататыны жастардың қатарының көбеюі. Мұсылман жұртшылығының асыға күткен Құрбан айт мерекесінде «Бала қажы» мешітінің Бас имамы Махмұд қажы Нұрұлы Құрбан шалудың қасиеті туралы уағыз-насихат айтып, құрбандық шалу тек мал бауыздаумен ғана шектелмейтінін ескертті. Онда адамның ішкі ниеті, шын пейілі, дінге бекемдігі, тақуалығы, басқаларға жанашырлығы таразыға түсетіндігін айта келе, Пайғамбарымыздың (с.ғ.с.) хадистері күллі мұсылман жұртшылығын бір-біріне жанашыр болуға, қамқорлық жасауға, қиналғандарға көмектесуге, жағдайы нашарларға қарасуға, өзара мейірімді болуға шақыратынын баян етті. Алла Тағала сондай ізгі амалдар жасауды баршаңызға нәсіп етсін деп, жиналған жамағатқа бата беріп, жамағат жергілікті уақыт бойынша 7:40-та намазға ұйыды. Айт намазына арнайы келген Октябрь ауданының әкімі Е.О.Темірханов барша мұсылман қауымын Құрбан айт мерекесімен құттықтап, жақсы тілектерін жаудырды. Айт намазынан соң, дәстүрлі әдіспен құрбандық шалу рәсімі өтті. Құрбан шалған мұсылмандардың мешітке қалдырған малдары мен еттері әлеуметтік жағдайы төмен отбасыларға, көпбалалы жанұяларға, жетімдер мен балалар үйіне таратылатын болады. Қасиетті мерекеге орай мешіт ауласына киіз үй тігіліп, мешіт асханасына кең дастархан жайылды, қымыз ішілді. Атаулы мереке осылайша үш күн тойланып, баршаға қуаныш сыйламақ!

«Бала қажы» мешітінің баспасөз қызметі