Зүл-хиджа айы қасиетті ай. Алла Тағала соғысуға, дау-жанжалға, қанды қырғынға тыйым салған төрт айдың (раджаб, зүл-хиджа, зүл-каада, мухаррам) бірі. Биылғы зүл-хиджа айы 14 қыркүйекте басталды. Зүл-хиджа айында мұсылмандар қажылық сапарға аттанады. Бұл айдың алғашқы он күні аса ерекше. Фәжр сүресіндегі: «Рауандап атқан таңмен, он түнмен ант етемін...» - дегенде зүл-хиджа айының алғашқы он күні меңзелген. Алла Тағаланың анты бұл күндердің қасиеттілігін көрсетеді.

Біздің Пайғамбарымыз осы күндердің ең қасиетті күндер екеніне куәлік еткен. Пайғамбарымыз: «Осы дүниенің ең қасиетті күндері – зүл-хиджа айының алғашқы он күні»-деген. «Оған ұқсайтындар жоқ па (яғни, осы күндері Аллаға құлшылық жасаушыларға)?»-деп сұрағандарға Пайғамбарымыз: «Тек Алла жолында өлтірілген адамнан басқа, Алла жолында оларға ұқсайтын ешкім жоқ»-деп жауап береді. Тек шахид қана осы күндері Аллаға құлшылық жасаушы адамдардан Алланың алдында жоғары болмақ.

Осы күндердің қатарында Арафа күні бар. Арафа – үлкен қажылық күні, күнәлар кешірілетін, оттан босатылатын күн. Сондай-ақ осы күндердің қатарында құбандық шалу күні бар. Бұл күн әр жылдағы ең жақсы күн. Алла елшісі: «Ең ұлы күн – құрбандық шалу күні»-деген.

Бұл күндердің басты ерекшелігі құлшылықтың барлық парыздарының үйлесетіндігінде. Хафис ибн Хаджар «Әл-Фатх» кітабында: «Зүл-хиджа айының алғашқы он күнінің қасиетті болуының себебі – құлшылықтың барлық парызының үйлесетіндігінде: намаз, ораза, құрбандық шалу, қажылық. Және бұл парыздардың бәрі басқа айларда тоғыспайды»-дейді. Алла елшісі: “Зүл-хиджа айының алғашқы 10 күнінде жасалған жақсы істен абзалы жоқ»-деген.

Арафа – зүл-хиджа айының тоғызыншы күні. Бұл күні ораза ұстау сүннет. Пайғамбарымыздан Арафа күнгі ораза туралы сұрағанда ол: «Осы күні ораза тұтқанның өткен жылғы және кейінгі жылғы күнәлары кешіріледі»-деген. Бұл күні науқастар мен жолаушыларға ораза ұстамауға болады. Арафа күнінде «Ықылас» сүресін мың рет оқыған абзал. Әрқайсын «Бісміллә» деп бастаған жөн. Бір хадисте «Ықылас» сүресін мың рет оқыған адамның бар күнәсі кешірілетіні айтылған. Пайғамбарымыз зүл-хиджа айының алғашқы он күнінде ұстаған оразаның әр күні үшін жүз құлды босатқанның, осындай жануарды садақа еткеннің және жиһад үшін осынша жылқы бергеннің сауабы болатынын айтқан. Ал хадистерде Арафа күнінде ұстаған ораза үшін екі жыл бойы ораза ұстағанның сауабы берілетіні, екі жылғы күнәлары кешірілетіні айтылады.

Осы айдың алғашқы күнінде көбірек құлшылық жасап, тәубеге түсіп, күнәлар үшін кешірім сұрап, жақсы істерді неғұрлым көбірек жасауға тырысқан абзал. Бұл күндердегі бойұсынушылық пен құлшылық бізді Аллаға жақындата түспек.

Қарағанды облыстық орталық мешіті

Әмина Омарова