Құрбан айт - барша мұсылман қауымның ұлық мерекесі! Мұсылмандардың басқадан ерекшелігі мейрамды құлшылықпен бастайтынында. Биылғы ұлық мерекенің алғашқы күні күнделікті таң намазымен басталып, артынша қасиетті Ясин сүресі оқылды. ҚМДБ-ның Қарағанды облысы бойынша өкіл имамы Өмірзақ қажы Қазкенұлы құрбан айттың маңыздылығы, қадір-қасиеті жайлы жарты сағат уағыз айтты. Қарағанды облысының әкімі Бауыржан Түйтейұлы жамағатты мейраммен құттықтап, жүрекжарды лебізін білдірді. Айт намазына келген жамағатта есеп жоқ. Мешіт ішінде ине шаншар орын болмады. Халықтың асыл дінімізге деген құрметінің жыл санап артып келе жатқанын көріп көзіміз тойып, жанымыз жадырап қалды. Намаз оқылып, тасбих тартылып, құран бағышталған соң келген жамағат мешіт жанынан арнай тігілген палаткаларда жайылған дастарханнан айттық дәм ауыз тиді! Құлшылығын орындап Алла үйінен ажарланып шыққан халық құрбандық шалуға бет алды.

Қарағанды облыстық орталық мешітінің баспасөз қызметі