ҚМДБ-ның Қарағанды облысына қарасты Қарағанды қалалық «Әл-Машани» мешітінің ұстазы Бақытгүл Айтқалиқызының ұйымдастыруымен ZOOM қосымшасында "Ихсан ілімі" аясында «Иман - Алланың нығыметі» атты рухани онлаин кездесу өтті. Расында ислам дінінің адамзат баласына қоятын ең басты талабы білім алу және іздену. Онлаин кездесу барысында мешіт жанындағы сауат ашу орталығында білім алған шәкірттер алған ілімдерін көпшілікпен бөлісті. Сондай-ақ,  екі дүние сардары Пайғамбарымыздың (с.а.с) сүннеттері, иманды адамдың келбеті, шынайы мұсылман адамның бойынан табылатын асыл қасиеттер, Құран оқып үйренудің артықшылықтары тақырыбында уағыз-насихат айтылды. Исламдағы білім алудың маңызы мен мәні түсіндірілді. 

 Алла Тағала Құран Кәрімде білімнің артықшылығын бізге былай баяндайды:

«Білетіндер мен білмейтіндер тең ба? Шын мәнінде ақыл иелері ғана ғибрат ала алады!" деген. («Зумар» сүресі, 9-аят)

Оған қоса Алла Тағала ілім берілген мүміндердін дәрежелерін басқалардан жоғары етеді. Ардақты пайғамбарымыз Мұхаммед ﷺ білім турасында машһур хадисте  «Білімді талап ету әрбір мұсылманға парыз», деген.  Әйел-қыздар қатысқан дәріс барысында осы бір игі құндылықтар баяндалып, қатысушылардың тарапынан түрлі сұрақтар қойылып, маңызды сауалдар талқыға салынды.