«Шешендіктен не пайда,

Артында сөзі қалмаса.

Батырлықтан не пайда,

Халқына қайраны болмаса»,-деп жырлап өткен Қаз дауысты Қазыбек би Келдібекұлының қазақты алар орны ерекше. «Жеті жарғыны» жасауға ат салысқан бабамыздың:

«Қазақ деген мал баққан елміз,

Ешкімге соқтықпай жай жатқан елміз,

Елімізден құт-береке қашпасын деп,

Жеріміздің шетін жау баспасын деп

Найзасына жылқының қылын таққан елміз.

Дұшпан басынбаған елміз,

басымыздан сөз асырмаған елміз» – деп айтқан даналық сөздері халықтар арасындағы бірлік пен татулық дипломатиялық қызметіне ту болған.

Ұлтымыздың шынайы жан ретінде өз абыройын асқақтатып, жеріміздің тұтастығы мен бірлігіміздің беріктігі үшін қажырлы қайраткерлік танытқан тарихи тұлғалардың бірегейі Қаздауысты Қазыбек би Келдібекұлының ерекше қасиетті дара жолына бүгінгі ұрпақ баба рухына тағзым етіп, мәңгі бас иеді! Осы орайда Қарағанды шаһарында жаңадан ашылған мешітке бабамыздың есімі берілді. Естеріңізге сала кетсек, осыдан дәл төрт жыл бұрын, яғни, 2017 жылы Рамазан айында Күнгей ықшамауданы, Онадасынова көшесі, 8 мекен-жайында жаңа мешіттің құрылысы басталған болатын. Құрылысы берекелі де сәтті аяқталған мешітке «Қазыбек би» атауы берілді. Айта кетейік, мешіт ғимаратының жалпы аумағы 1000 шаршы метрден асады. Оның ішінде ер намазханасы және әйел жамағатына арналған намазханалары мен дәретханалары қарастылылған. Сонымен бірге, имамдар бөлмесі, діни тәлім алатын сыныптар және кітапхана қарастырылған.