Әлихан Бөкейхан атындағы Теміртау орталық мешітінде қала имамдарына арналған ҚМДБ құжаттарын насихаттау семинары өтті. Қала бас имамы Естай Айтуғанұлының төрағалығымен өткен жиынға Теміртау имамдары мен ұстаздары қатысты.
 
Жиын барысында Қазақстан мұсылмандары діни басқармасының жұмыс бағытын айқындап, тың серпін берген концептуалды құжаттар тағы бір талқыланып, оларды мешіттің ішкі ережелері мен жұмыс тәртібінің негізіне айналдыру мәселесі сөз етілді.
 
Айта кетейік, Қазақстан мұсылмандары діни басқармасының ұйытқы болуымен әр жылдары ұйымдастырылған Имамдар форумында қазіргі уақытқа дейін 10 құжат қабылданған болатын: «Қазақстан мұсылмандарының тұғырнамасы», «ҚМДБ қызметкерінің этикасы», «Имамның тұлғалық келбеті», «Мұсылманның тұлғалық бейнесі», «Жеті рухани қазық», «Діни рәсімдер тізілімі», «Діни лауазымдар тізілімі», «Ас беру мәдениеті», «Зират және зиярат мәдениеті» және «Зияткер имам» тұжырымдамасы.