Журналист, велошабандоз Ернат Мелсұлы хан Кенесары бабамыздың туғанына 220 жыл толуына орай «Кенесары – 220» велошеруін бастаған болатын. Мақсатқа орай, Ернат Мелсұлы елордадағы Кенесары хан ескерткішінен бастау алып, 220 шақырымды артқа тастап, Қарағанды қаласының Тәуелсіздік стелласындағы мәреге ат басын тіреді.    
 
Велошабандоз елордаға қайтар жолда Теміртау қаласында Алаш көсемі Әлихан Бөкейхан атындағы Орталық мешітке соғып, зиярат етуді ниет етіпті. Осыған байланысты бабаларымыздың рухына Құран бағыштап, мешіт имамдары мен ақсақалдардың батасын алды.  
 
Айта кетсек, «Толық адам һәм төрт даму» идеясының авторы Ернат Мелсұлы қоғам арасында саламатты өмір салтын белсенді насихаттаушы. Бұдан бұрын Хакім Абайдың 175 жылдығына орай «Нұр-Сұлтан – Жидебай» бағытында және «Оразадағы 99 шақырым» атты велошерулерді ұйымдастырған.   
 
Сондай-ақ осы жылы қыс мезгілінде ұлт ұстазы Ахмет Байтұрсынұлының 150 жылдық мерейтойы аясында еліміздегі тұңғыш қысқы велошеруін ұйымдастыру арқылы Қазақстан рекордын орнатып, 150 шақырым қашықтықты бағындырған.