Әлихан Бөкейхан атындағы Теміртау орталық мешітінде «Зейін» оқырмандар клубының басқосу жиыны өтті. Клуб мүшелері жуырда оқуға ұсынылған «Үміт сәулесі» кітабын жан-жақты саралап, ішіндегі мәліметтер бойынша арнайы сұрақ-жауап айдарын өткізді. Дұрыс жауап берген оқырмандарға кітаптар сыйға берілді.
 
Теміртау орталық мешітінің наиб имамы Асхат Нұртайұлы мен «Зейін» филиалының жетекшісі Жақсылық Хайруллаұлы жиналған қауымға ілім алудың мән-маңызын түсіндіріп, оқырмандарды кітап оқу мәдениетін бірге қалыптастыруға шақырды.
 
Айта кетсек, жуырда Қазақстан мұсылмандары діни басқармасына қарасты «Зейін» оқырмандар клубының Теміртау қаласы бойынша филиалы ашылғанын хабарлаған едік. Клуб мүшелерінің ай сайынғы басқосуында түрлі пайдалы кітаптар сараланып, оқуға ұсынылмақ. Кітапқа қызығушылығы бар кез-келген кісі (мешіт шәкірттері, қала тұрғындары, студенттер мен мектеп оқушылары) оған мүше бола алады.