Саяси қуғын-сүргін құрбандарына Құран бағышталды

Әлихан Бөкейхан атындағы Теміртау орталық мешітінде саяси қуғын-сүргін құрбандарын еске алу күніне орай мешіт шәкірттері мен ұжымы 30 пара Құран хатым оқыды. 

Теміртау қаласының Бас имамы Естай Айтуғанұлы алдымен жамағатқа ел үшін жанын пида еткен бабаларымыздың ерен еңбегі жайлы уағыз-насихат айтты: «Біздің ұлт ретінде ұйысып, еңселі ел болып отырғанымыз әуелі Алла, сосын кешегі ата-бабаларымыздың қайтпас қайсарлығы мен жанкешті ерліктерінің арқасында деп білеміз. Басы айдауда, қолы байлауда жүрсе де ебін тауып ел үшін еңбек етті. Раббымыз оларды өз рақымына бөлесін!», - деп лебізін білдірді.

Артынша жамағатпен Құран хатым дұғасы оқылып, сауабы бабаларымыз атына бағышталды.

Айта кетсек, кешегі тоталитаризм саясаты арқылы қаншама ұлт өкілдері зардап шекті. Жазықсыз жазаланғандардың қатарында Ә.Бөкейхан, А.Байтұрсынұлы, М.Тынышбаев, М.Дулатұлы, Т.Рысқұлов, М.Жұмабаев, С.Сейфуллин, І.Жансүгіров, Б.Майлин, С.Асфендияров сияқты мемлекет және қоғам қайраткерлері, ұлт зиялылары болды.