Теміртау жамағаты Қадір түніне жиналды

Бүгін қасиетті Қадір түнінде Теміртау жұршылығы Әлихан Бөкейхан атындағы орталық мешіті мен Жақып Ақбай атындағы қалалық мешітіне ағылды. Осынау ғибратты кешті жамағатпен бірге өткізуге екі мешітке сан мыңдаған адам жиналды.

Жаратушы Иеміз бұл түнде жасалған құлшылықты мың айда жасалған ғибадаттан артық деп қабылдаған. Қадір түні - Пайғамбарымыз Мұхаммедтің (с.а.у.) үмметінен басқа ешбір үмметке берілмеген Алланың сыйы.

Жиналған қауым - «Әлихан Бөйкейхан» мешітінің жамағаты мың айдан да артық бұл түнді ғибрат пен ғибадатқа толы өткізуде. Мешітте ең әуелі құптан және тарауық намаздары оқылды, насихат айтылды. Бұдан соң Теміртау қаласының бас имамы Естай Айтуғанұлы жамағатты Қадір түнімен құттықтай келе, айлардың сұлтаны, уақыттың ең киелісі - Рамазан айында және оның қасиетті түні - Қадір түнінде қылған құлшылықтары мен жасаған мінәжаттарын Алла қабыл етсін деп тіледі.

Айта кетсек, бүгін Теміртау қаласының екі мешітінде де 1000 адамға ауызашар беріліп, 3 000 жамағатқа сәресі ұйымдастырылған.