ҚМДБ-ның «Уақып» корпоративтік қорының Қарағанды облысы бойынша жауапты өкілі Бақдәулет Қыдырбайұлының ұйымдастыруымен «Береке» дәмханасында Жақсылықовтар әулеті ауызашар дастарханы жайды.

  Рамазан айының басты ерекшелігінің бірі - қайырымдылық пен жомарттықтың қанатын кеңге жаятын сәті артады. Берекелі айдың құрметіне орай жайылған дастарханда мешіттің абыз ақсақалдары, қамқорлыққа мұқтаж жалғызбасты аналар, жетім балалар үйінің жеткіншектері мен кәсіпкер азаматтар бас қосты. Алланың алдында бір уақытта, бір дастарханда, бір атаның баласындай тоғысқан жандар Жаратқан иемізден жарылқау тіледі.   "УАҚЫП" қорының өкілі Бақдәулет Қыдырбайұлы жиналған қауымға рамазан айының құндылықтары жайында насихат айтып, қайырымды істің қасиеті турасында уағыз жүргізді. Кеш барысында оразаға қатысты викториналық отыз сұрақ қойылып, жауап берген қонақтарға ораза кітаптары мен кәдесыйлар таратылды. Жомарттықты мұсылмандық борышым деп санап, ақ дастарханын жайған Жақсылықовтар әулетіне ақсақалдар қауымы ақ батасын берді.