Қасиетті Рамазан айы мұсылмандар үшін нағыз сауапқа кенелетін мерзім. Осыны ұғынған Қарағанды шаһарының кәсіпкер ханымдары әйелдер жамағатына арнап ауызашар берді. Берекелі рухани шара ҚМДБ-ның Қарағанды қалалық «Әл-Машани» мешітінің ұстазы Бақытгүл Айтқалиқызының ұйымдастыруымен жүзеге асты.

Пайғамбарымыз (Оған Алланың игілігі мен сәлемі болсын): «Кімде-кім, ораза ұстаған бір мұсылманның аузын аштырса (ауызашар берсе), ораза ұстаушының сауабындай сауабқа ие болады. Әрі оразашының ешбір сауабы кемімейді» дейді.

Рухани отырыста ақ жаулықты әжелер, аяулы аналар, ибалы қыздар мен бақ гүлі болған балалар дастарханында бас қосты. Шара барысында ҚМДБ-ның Қарағанды облысы бойынша "Әйел-қыздар" секторының  ұстаздары Бақытгүл Айтқалиқызы, Арай Серғалиқызы, Гүлжазира Ақназарова әйелдер жамағатына арнап әсерлі уағыз-насихат айтты. Сондай-ақ,  жақсылық пен садақаның сауабы еселенетін берекелі айдың құрметіне орай қайырымдылық жүзеге асып, көп балалы, жалғыз басты, көмекке мұқтаж отбасыларға қаржылай көмек берілді.  

Кеш барысында  «Әл Машани» мешітінің қажы  апалары оқыған  Құранның хатым дұғасы жасалды. Сондай-ақ, құлшылыққа арнайы уақыт бөлініп, Аллаға зікір айтылып, пайғамбарымызға (Оған Алланың игілігі мен сәлемі болсын) салауат жолданды. Мешіт шәкірттері рамазан айының құрметіне жарапазан жырын айтты. 

Осындай игі істі жүзеге асырып, көптеген жанның ауыз ашуына себепкер болған ханымдарға алғыс айтылып, қасиетті Құран Кәрім сыйға тартылды. Рухани кештен ерекше әсер алған әйелдер жамағаты көтеріңкі көңілмен тарқасты.