ҚМДБ-ның Қарағанды өкілдігіне қарасты Теміртау қаласының «Әлихан Бөкейхан» атындағы орталық мешітінің ұйымдастыруымен Қазақстан Республикасы Тәуелсіздігінің 30 жылдығына орай мешіт жамағаттары арасында шағын футболдан турнир өтті.
 
Арнайы спорт алаңында ұйымдастырылған «Тәні саудың – жаны сау» атты футбол жарысына аға буын мен жас ұрпақ өкілдерінен құралған 15 команда қатысты.
 
​Жамағаттың ауызбіршілігін арттыру, ынтымақтастығын нығайту және салауатты өмір салтын ұстануға бағытталған спорттық іс-шара шымылдығын Теміртау қаласының бас имамы Естай Айтуғанұлы ашып, жарысқа қатысушы командаларға сәттілік тіледі.
 
​Спорттық додадағы әр ойын қызу да тартысты өтіп, жарыс нәтижесінде І орынды «Барыс» командасы иеленсе, ІІ орын «Тарлан» командасына, ал ІІІ орын «Сұлтан» командасына бұйырды.
 
Жүлделі орын иегерлеріне сәйкесінше 50 000 , 30 000, 20 000 мың теңге берілді. Бұдан бөлек, аталмыш командалар арнайы кубоктармен және алғыс хаттармен марапатталды.
 
Турнир барысында жақсы ойнымен көзге түскен командаларға, сондай-ақ үздік ойыншы, үздік қорғаушы, үздік қақпашы аталымдары бойынша үздік деп танылған ойыншыларға құнды сыйлықтар табыс етілді.