Ислам діні бойынша науқасты зиярат ету (яғни көңілін сұрау) – сүннет. Адамгершілік қағидасына сүйенсек те, бұл ұлты мен ұлысына қарамай мәдениеттілікке жатады. Халық даналығында «Аурудың емі – саудың сәлемі» деп текке айтылмаса керек. Себебі, көңілі жан жарым боп жатқан науқасты зиярат ету – рухани демеу. Адам қиналғанында мейлі жас, мейлі қарт болсын жанына демеу, көңіліне медеу болар бір жылы сөз күтіп, айналасынан жылы қабақ күтетіні белгілі. Сәтбаев қаласындағы облыстық фтизиопульмологиялық орталығында (тубдиспансер) ем қабылдап жатқан жандарға қасиетті Рамазан айының құрметіне қайырымдылық жасау мақсатында 50 "Ауызашар қоржыны" таратылды. Карантиндік талаптарға байланысты стационарда емделіп жатқан жандармен видео арқылы байланысқа шыққан «Балмағамбет Балқыбайұлы» мешітінің  азаншысы Сағындық Мұхиденұлы науқастарға Алладан шипа сұрап, тезірек сауығып кетулеріне тілектес екенін жеткізді.