Бүгінгі таңда жер-жерде қаржы мен уақытты үнемдеудің тетіктері жиі айтылып жүр. Діни рәсімдерге қатысты қарастыратын болсақ, халық арасындағы жерлеу рәсімдеріне байланысты іс-шараларда ысырапқа жол бермеу қажеттілігі де туындап отыр. Қаржылық дағдарысқа қарамастан, арамызда ысырапқорлық ахуалының тоқталмай келе жатқаны да жасырын емес. Осы жайттарды жалпы халық түсініп, бірізділікке түсіру жайында пікірлер айтылуда. Сондықтан мұсылмандық әдебіміз бойынша қайтыс болған кісіні жөнелту рәсімдерінде қаза болған үй иелеріне де салмақ түспейтіндей дәрежеде өткізуді мықтап қолға алуымыз қажет. Жалпы не нәрсенің де байыбына барып, оны өз дәрежесінде атқаруға бейімделетін уақыт жетті. Тіршілік болған жерде қаза  болмай тұрамайды. Мәңгілік өмір Алланың еншісінде. Осындай сынақ түскен сәтте ең бірінші шариғат қағидаларын басты кезекке қойып, ал қонақ күту, ас беру сынды дүниелік істерді екніші орынға қоюымыз қажет. Әсіресе, қонақасы дастарханын той дәрежесінде даярлап, түрлі тағамдармен (салаттар, жеміс-жидектер, балық, құс еті, шырындар, дәнді дақылдар)  толтыру артық болып есептеледі. Шынтуайтында сол дәмдердің көбісі желінбейді. Қазаға арналған дастархан мәзірі орташа болып жабдықталғаны жөн. Бұл біріншіден, қаза болған үй иелеріне жеңілдік. Екіншіден, дінімізде ысырап деген ұғымға қайшы келеді. Сондықтан Алла сүймейтін ысырапқа жол беріп алып, сауап деген қастерлі ісімізді әлсіретіп алмауға тиіспіз. Жалпымызға ортақ іс болғандықтан осы жайттарды баршамыз, ардақты ақсақалдар, діни қызметкерлер және басқамыз бірігіп, нақты шаралар белгіленген халыққа үндеу қабылдауымыз қажет деп есептеймін. Ақшаны есепсіз шашу, асты ысырап қылу — қасиетті «Құран-Кәрімде» қатаң айыпталатын қылық. Жалған намыс пен бәсекеге ұластыратын аста-төк жарысу жақсы іс емес. Қазақтың сонау 30 жыл бұрынғы жаназасында дастарқанда тек бауырсақ пен қант, ас пен сорпа ғана тұратын. Демек, жаназа дастарқанын тек санаулы тағам түрімен ғана шектеу керек. Одан артығы – ысырап болып саналады. Дұрысында, дастарқанға қойылар ас мәзірін жеті тағамнан асырмау керек. Сонда жерлестеріміз біртіндеп, ұқыптылық пен үнемге үйренеді. Ал, садақадан қалған ас жоқ-жітік, жалғызбасты жандарға таратылса өте сауапты болады. Сондай-ақ  жаназаны жиналысқа айналдыру мен оған асабаны жалдаудың, көп сөйлеудің өзі асқа жиналғандардың уақытын рәсуа етуге апарады. Сонымен қатар, ас беру барысында күндердің ұлығы болып саналатын жұма күні дәл жұма намазы оқылатын уақытқа ас беруді де жүйелеп алғанымыз жөн. Ас беру шарасын жұма күні 12.00 немесе 14.00 шамасында жасайтын болсақ, құлшылық жасайтын адамдардың ғибадаттарына кедергі болмайды. Жалпы адами құндылық арқылы қарайтын болсақ та жұма намазында ғибадат жасайтын мезгілде ас ішіп отырудың өзі біздің мұсылмандығымызға үлкен сын. Осы сынды жайттарды өз деңгейінде атқаруды көп болып қолға алуға шақырамын. Қорыта айтқанда, ысырапқорлық — Алла алдында күнә болып есептелетіндігін ұғынуымыз керек.                                     

ҚМДБ-ның Қарағанды өңірі

 бойынша өкіл имамы

Өмірзақ қажы ҚАЗКЕНҰЛЫ