Биссмиллаhирраhманирраhим! Биыл 2015 жылдың соңында құрметті мерекеміздің бірі «Мәулітке» амандықпен жетіп отырғанымызға бүкіл әлемнің Раббысы Аллаға сансыз шүкірлік!

Мұсылман халқының мерейлі мерекесі – «Мәуліт» күні үстіміздегі жылдың желтоқсан айының 22-ші жұлдызында кіреді. Асыл Пайғамбарымыз Мұхаммед (оған Алланың игілігі мен сәлемі болсын) Раббиул-әууәл айында дүниеге келген. Бұл мерекені Пайғамбарымыздың (оған Алланың игілігі мен сәлемі болсын) заманында тойламаған. Кейін келе, Алла елшісін (оған Алланың игілігі мен сәлемі болсын) еске алып, оның хадистерін өзгелерге жеткізіп, мол салауат айтып, ерекше құрметпен тойлай бастаған. Сол себепті кейбір деректерде әртүрлі мәліметтер кездеседі. Дін ғалымдары Пайғамбарымыздың (оған Алланың игілігі мен сәлемі болсын) туылған күнін Рабиул-әууәл айының 9-жұлдызы десе, кейбір деректерде 12-сі деп келеді. Сондықтан болса керек, бұл мереке бір айға жалғасады. Мәуліт күнін бір ай көлемінде мерекелеп, дінімізді насихаттау егеменді еліміздің жылдағы дәстүріне айналуда. Дініміз кеңінен қанатын жайып, білім алуға еркіндік туған бейбіт заманда ардақты Пайғамбарымыздың (оған Алланың игілігі мен сәлемі болсын) өмірбаянын көпке насихаттау баршамыздың борышымыз болса керек. Мәуліт мерекесін аса ыждаһатпен тойлатқан абзал. Алла елшісі Мұхамедке (оған Алланың игілігі мен сәлемі болсын) көптеп салауат айтып, өмірінен деректер келтіріп, мешіттерде жамағатқа жеткізілуі дұрыс. Осы мерекеде дінімізді насихаттау үлкен көрініс табады. Алла Тағала Құран Кәрімде: «Расында Алла, Пайғамбарға рахмет етеді. Және періштелер салауат айтады. Әй Мүміндер! Оған салауат және ықыласпен сәлем келтіріңдер» - деп айтқан (Ахзаб сүресі, 56-аят). Пайғамбарға «оған Алланың игілігі мен сәлемі болсы» деп салауат айту үлкен жақсылық, қайыры бар іс. Оның (оған Алланың игілігі мен сәлемі болсын) шапағатына бөлену үшін, Алла елшісінің (оған Алланың игілігі мен сәлемі болсын) есімі аталған жерде міндетті түрде салауат айтқан абзал. Бізге жеткен хадистер бойынша бірде Пайғамбарымыз (оған Алланың игілігі мен сәлемі болсын) қызы Фатимаға (оған Алла разы болсын): «Адамдардың ішіндегі ең сараңы кім деп ойлайсың?» – дейді. Фатима (оған Алла разы болсын) анамыз: «Алла берген дәулеттен садақа бермейтін адам»,– деп жауап береді. Сонда Пайғамбарымыз (оған Алланың игілігі мен сәлемі болсын): «Жоқ, менің атым аталған жерде маған салауат айтпағандар ең сараңдар!» – дейді. Сондықтан, Пайғамбарымыздың (оған Алланың игілігі мен сәлемі болсын) Мұхаммед, Мұстафа, Ахмад деген есімдері аталған уақытта «Саллаллаһу аләйһи уә сәлләм» немесе өз тілімізде «оған Алланың игілігі мен сәлемі болсын» деп салауат айту – әрбір мұсылманның міндеті болып қала бермек. Сол үшін «Уа, Мұхаммед! Саған сансыз салауат болсын!» деп Пайғамбарымыздың (оған Алланың игілігі мен сәлемі болсын) туылған күнін еске алып, ол күндері салауат айтсақ, әрине сауапқа кенелеміз.

Пайғамбарымыз (оған Алланың игілігі мен сәлемі болсын) жайлы Құран Кәрімде көптеген аяттар бар. Оның көркем мінезі туралы «қалам» сүресінің 4-аятында «Сөзсіз, сен ұлы мінезге иесің» десе, сахаба Жәбир (оған Алла разы болсын) риуаят еткен хадисте Пайғамбарымыз (оған Алланың игілігі мен сәлемі болсын): Алла Тағала мені көркем мінез-құлықты толықтыру үшін жіберді» деген (Муатта, Бәйхаки). Олай болса екі дүние жақсылығына жеткіміз келсе, құрметті Пайғамбарымызды (оған Алланың игілігі мен сәлемі болсын) өзімізге үлгі тұтып, көркем мінезін басшылыққа ала отырып, әрдайым сүннетімен жүруге тырысуымыз қажет.

Пайғамбарымыз (оған Алланың игілігі мен сәлемі болсын) туралы ақпарат беріп өтсек, ұлты – араб, Құрайыш тайпасының Хашимұлдары әулетінен шыққан. Әкесі - Абдолла, анасы – Әмина. Құрсақта жатқанда әкесінен, алты жасында анасынан айырылып тағдыр тауқыметін тартқан. Біраз уакыт атасы Абдулмуттолиб тәрбиесінде болып, 8 жасқа қадам басқанда одан да айырылып, немере ағасы Әбутәліптің қамқорлығына көшеді. Жеті перзенті өмірге келіп, бірақ Фатима (оған Алла разы болсын) деген қызынан басқалары жастайынан қайтыс болған. Ұрпағы Фатимадан (оған Алла разы болсын) тарайды. Қырық жасында рамазан айында Хира тауында Жебірейіл періште келіп, бүкіл адамзат баласы мен жындарға пайғамбар болғандығын хабарлайды. 23 жыл бойына Құран уахи етіліп, Пайғамбарымыз (оған Алланың игілігі мен сәлемі болсын) һижраның он бірінші жылында рабиғул әууәл айының он екісі, дүйсенбі күні Мәдина мнаууарада қайтыс болды. Айша анамыздың хұжрасына жерленген. Пайғамбарымыздың (оған Алланың игілігі мен сәлемі болсын) осындай қысқа ғана өмірінде көптеген игілікті істерімен бүкіл адамзатқа үлгі болып кеткендігі турасында барша адамзатқа жеткізу қандай ғанибет десеңізші. Мәуліт мерекесінде жер-жерлердегі мешіттерде Құран оқылып, көптеген уағыздар айтылып, салауаттар оқылғаны ләзім. Мәулітті тойлату турасында атақты ғұламалар көптеген пікірлер қалдырған. Көпшілікке танымал, беделді ғұлама Имам Суютый: «Менің пікірімше, адамдардың мәуліттің құрметіне жиналып Құран оқуы, Мұхаммедтің (оған Алланың игілігі мен сәлемі болсын) пайғамбарлығы, дүниеге келуі турасында әңгіме етуі, ысырапкершіліктен сақтанып ас ұсынуы Алла елшісіне (оған Алланың игілігі мен сәлемі болсын) деген құрмет ретінде жасалған игі әрі сауапты іс және қуаныш», – деген. Әбу Шама бұл мейрамға анықтама беріп: «Біздің дәуіріміздегі жақсы амалдың бірі – мәулітті садақа берумен, уағыз айтумен және өзара жайдары болумен өткізу. Осының бәрі Пайғамбарымызға (оған Алланың игілігі мен сәлемі болсын) деген сүйіспеншілік пен құрметтің әрі Алла Тағалаға болған шүкіршіліктің белгісі» деген.

Барша мұсылманның сүйіктісі болған Пайғамбарымызға (оған Алланың игілігі мен сәлемі болсын) салауат айтып, өзгелерге жақсылық жасаудың сауабы теңдессіз. Құран оқып, Алла елшісінің (оған Алланың игілігі мен сәлемі болсын)өмірі мен өнегесі жайлы кітап оқудың да мұсылманға берері мол. Алла тағала елімізге, жерімізге берекетін жаудырып, халқымыздың кең

пейілі мен ізгі ниетіне сай бірлік берсін! Екі дүниеде де жүзімізді жарқын, дүғамызды қабыл қылғай!

Дариев Берік Әлсейітұлы