Егер ата-анаң саған разы болса, Алланың разы болғаны. Шариғатқа қайшы келмейтін істің бәрінде баланың ата-анаға бойұсынуы – Алла жүктеген міндеттердің бірі. Мұсылман адам ата-анасына қайырымды болып, құрмет көрсетуі керек. Өз ата-анасына құлақ аспайтын, оларды керек қылмайтын адам шынайы мұсылман емес. Ата-ананы тыңдау – Шариғат парыздарының бірі.

Исламда ата-анаға жасалатын қарым-қатынасқа баса маңыз берілген. Маңыздылығы жағынан Аллаға сенім келтіріп, құлшылық қылудан кейін тұр. Алла Тағала Құранда Өзіне ғана бойұсынуды және ата-анаға жақсылық жасауды бұйырады. Баланың қартайған ата-анасына қарсы келуіне, тіпті олар жұмсаса «туф» деп айтуға құқығы жоқ. Ата-ана үшін: «Раббым, мені кішкентайымнан бағып, тәрбиелегеніндей оларға да мейірім ет!»-деп дұға жасалады.

Мұхаммед Пайғамбардың (с.ғ.с) заманында өте көп дұға, құлшылық жасаған, ораза ұстаған п Алкамат есімді адам өмір сүрген. Ажалы жеткен шақта әйелі Пайғамбарға шахада айтқызу үшін адам жіберуін сұрап келеді. Алла елшісі оған үш сахабасын жібереді. Сахабалар шахаданы айтқызбақ болғанымен ол тілге келмей қояды. Сахабалар Алла елшісіне қайтып келіп, шарасыздықтарын айтады. Алла елшісі сонда: «Оның ата-анасы бар ма?»-деп сұрайды. Сахабалар: «Иә, қарт анасы бар»-дейді. Алла елшісі Алкаматтың қарт анасын өзіне шақыртады. Келген соң анасынан ұлы туралы сұрағанда, анасы ұлына ренжулі екенін, себебі ұлы әйелін көп жақтағанын айтады. Сонда Алла елшісі: «Алкаматтың тілін байлап тұрған жағдай міне осы»-деп қарт анасынан ұлын кешіруді сұрайды. Қарт ана көңілі қалғаны соншалық, ұлын кешіру оңай еместігін жеткізеді. Сонда Алла елшісі көптеп ағаш жинап әкелуді бұйырады. «Не үшін?»-деп сұрайды қария.

- Алкаматты отқа өртейміз – деп жауап береді Алла елшісі.

- Баламды көз алдымда өртегенін қалай көтеремін-деп жан ұшырады қарт шеше:

- Тозақ оты бұдан да күшті – дейді қасындағылар.

Сонда ғана Алкаматтың анасы бәрінің алдында ұлын кешіреді. Анасының разылығынан кейін ғана Алкамат тілге келіп, шахада айтқан екен.

Қарағанды облыстық орталық мешіті

Әмина Омарова