Алла  Тағала Құранда: «Шайтан – сенің дұшпаның» - дейді.  Көрінбейтін дұшпанмен күресу көз алдыңдағы жауыңмен күрескеннен әлдеқайда қиын. Адамның көрінбейтін дұшпаны адамдарға қанша қайғы-қасірет әкелетінін және оған қанша адамның жұмыс істейтінін елестету де мүмкін емес. Ол қаншама мұсылманды бір-біріне айдап салуда. Құранның «Егер мұсылман шын ниетімен кешірім сұраса, Мен оның барлық күнәларын кешіремін» деген аяты түсірілгенде шайтан не істеу керектігін ұзақ ойланып, мұсылмандар  арасында  түрлі дау-жанжалдар  тудыруды  ойлап  табады. Құранның 10, 30-сүрелерінде «Барлық  келіспеушілік пен дау-жанжал – шайттаннан» екені  анық  айтылған. Көрінбейтін  дұшпанды  адам ойлап  тапқан  ешқандай амал-айламен жеңу  мүмкін  емес. Онымен тек Алла атымен ғана  күресуге болады. Алла Тағала  көрінбейтін дұшпанмен  қалай  күресу, қандай  дұғалар  арқылы  қорғану жайлы  Құранда пайғамбарлар мен халықтар  тарихынан  айқын  дәлелдер  келтіріп  түсіндіреді.

Бірде бір сахаба есектен құлап қалып, шайтанды тілдей бастағанда Пайғамбарымыз (Оған Алланың игілігі мен сәлемі болсын): «Шайтанды тілдеме, сен тілдесең ол Ұхұд тауындай үлкейе бермек, «Бісміллә» дегін, сонда ол кішірейе бермек, сені сонда ғана ол жеңе алмайды» деген екен.

Ақыл және жұмақ пен тозаққа апаратын жолдардың бірін таңдау құқығына ие болған адамнан басқа Алланың жер мен аспандағы барлық жаратқандары Алла бекіткен өз міндеттері мен функцияларын атқаруда. Ал, біздің көпшілігіміз Алланың нығметтеріне разылық танытпаймыз, Құран мен хадистерді оқымаймыз, пайғамбарлардың айтқандарына құлақ аспаймыз. Шүкіршілік етудің, орнына күпірлігіміз көп. Барлық Пайғамбарлар, Құран мен хадистердің  үндейтіні  бір  Аллаға  ғана сену. Ал адамдар  көрінбейтін  дұшпанның  кесірінен  үлкенді-кішілі  күнәларды  күнсайын  жасайды. Адам бойындағы  қызғаныш, бірін-бірі  көре алмау, «басымнан  сөз  асырмаймын» деп  сөзге  тоқтамай  мүміндер  мен  орынды-орынсыз  ұрысып-керісу, ұрлық-қарлық, өзгелердің  басындағы  қайғы-қасіретке  беймарал  қарау  сынды  барлық  жаман  қасиеттер – шайтаннан. Әрқайсымыз  өзіміздің  күнделікті  жүріс-тұрыс, іс-әрекеттерімізге  анықтап зер салсақ  күніне  қанша  күнә  жасап  жатқанымызды  байқар  едік. Кез-келген  жерде  екі-үшеуіміздің басымыз  қосыла  қалса  әркім-біркімді  сөз қылып,  шекеміз қызып өсек-аяңға шек қоймаймыз. Өзің сияқты адамдарға түсіністікпен қарау,  кешірім, мейіріммен  қарау  деген  түсініктер  санамыздан  шығып  барады.  Мұның  бәрі  иманның  әлсіздігінен. Осы себепті де қазір  адам баласы азғындап, шариғатқа мүлде қайшы келетін күнәларға жол беріп жатқанына куә болып  жүрміз. Өйткені  өзімізді Алла Тағаланың  жаратқанын, ақыретке барып  күнә мен күпірліктеріміз  үшін  жауап  беретінімізді  ойлап бас қатырмаймыз. Атам  қазақта «жалғанның қысасы ақыретке  кетпейді» деген де сөз бар. Пенде әр жасаған күнәсі, тіпті жаман ойы мен бір ауыз ғайбат сөзі  үшін осы өмірде  де жазасын алып  жатады. Сол  жамандықтары  өзінің  алдынан  басқа  бір  жамандық  болып  шығады. Ал адамның  істеген  жақсылығы мен жамандықтары  үшін ақыретте  жауапқа  тартылуы таразыға  тартылмайтын  дүние. Алланың  өзі  айтқан  анық  ақиқат.

Барлық пайғамбарлар мен елшілер бір ғана жолмен, яғни Хақ Алланың ғана жолымен жүрген. Яғни барша әлемде бір ғана Жаратушы, бір ғана Алла бар.  Қорғаушы да, сақтаушы да тек Алла ғана. Әркез бізді азғырып, түртпектеп,  жамандыққа  шақырып  тұратын  шайтаннан да бізді  Алланың  өзі  ғана  сақтайды. Шын мұсылман, Алла жолында  жүрген  мүмін  құлдарды  шайтанның  азғыруға шамасы  жетпейтіні  туралы  хадистерде де айтылған. Алла Тағала баршамыздың  иманымызды  күшейтіп, шайтанның жолына түсуді емес, хақ жолға түсуді нәсіп етсін дейміз.