Құрметті жамағат, желтоқсан айынан бастап Пайғамбарымыздың (ﷺ) туған айы – Рәббиәәууәл айы туды. Әрбір мұсылман адам шамасы келгенше Пайғамбарымызға (ﷺ) салауаттар айтқаны абзал.

Алланың сөздері – баға жетпес байлық, ақыл жетпес даналық, тіл жетпес шешендік. Әр аяты өз ішінде көл-көсір мағына қамтып, ойланғанның көзіне жас келтіріп, ұғынғанның иманын арттыра алады. «Ахзаб» сүресінің 56-аятында: Расында Алла, Пайғамбарға рахмет етеді. Және періштелер салауат айтады. Әй Мүміндер! Оған салауат және ықыласпен сәлем келтіріңдер» - деген. Алла Тағала Өзінің Пайғамбары, соңғы Елші Мұхаммедке салауат айтып, оны Өзінің періштелерінің алдында жақсы сипаттармен сипаттап, оған мақтау айтады екен. Бұл жалған өмірімізде біреуді халық мақтаса, төбесі көкке екі елі жетпей қуанып, есінен тана жаздайды. Соңғы жылқысы қалса соны сойып, көл-көсір думан жасап, асыр салып, марқайып қалады. Ертелі-кеш сол пендені қала әкімі мақтап, «құрмет тақтасына» есімін шығарып қойса, бірте-бірте қалың жұрттан көз үзіп, өзінің елге сыйлы, мақтаулы жан екенін місе тұтып, кербездене бастайды. Ал, енді елбасы мақтап, марапаттайтын болса мүлдем ұстатпай, қуанышында шек жоқ болып, өмірдің мәні мен сәніне қол жеткізгендей болатыны рас. Енді сәл ғана ақыл көзімен осы аятқа қарап көрейікші, ұлы Раббымыз біреуді мадақтап, мақтайтын болса бұдан артық бақыт бар ма? Әлемдерді Жаратушы Раббымыз Өзінің күнәдән пәк періштелерінің алдында Пайғамбарымыз Мұхаммедті атап, жақсы сипаттармен сипаттауы – ең ұлы мақтау әрі баға жетпес мадақ емес пе?! Міне, осы бір мадақ түріне Пайғамбарымыз Мұхаммед лайықты бола алды. Ондай болса ол кісінің сүннетіне ілесіп, дінін ұстанған адам да осы бір мадаққа іліге алары сөзсіз! Жоғарыдағы аятта «...және періштелер» делінген. Енді бір сәт назар аударсақ, Алла Тағала «періштелер» деп, көпше түрде айту арқылы барлық періштенің салауат айтатынын атап өткен. Құран мен сүннеттен хабар келген періштелерге кішігірім шолу жасап өтер болсақ, аспандар мен жерді мекендейтін періштелер саны өте көп әрі олардың саны бір Аллаға мәлім.  Жетінші аспандағы «Бәйтүл мағмұрға» күніне жетпіс мың періште кіріп, екінші рет қайтып кірмейтіні айтылған. Адам атадан осы Қияметке дейінгі әрбір адам қасында жақсылығы мен жамандығын жазып отыратын екі періштеден болады, сондай-ақ әрбірінің алды мен артынан да екі періште бар. Уахи әкелуші періште, табиғат заңдылықтарын реттеуші періште, өлім періштесі, Қияметте сүр үрлейтін періште т.б. бізге хабары мағлұм періштелер мен біз білмейтін періштелер саны өте көп. Енді осынау сансыз періштелердің Пайғамбарға салауат айтып, Алладан дұға тілеуі – Пайғамбарымызға берілген үлкен нығмет емес пе?! Бұл Алланың мейірімінің кеңдігі, Пайғамбарға деген пазылы. Алла Елшісіне (оған Алланың игілігі мен сәлемі бослын) айтылатын салауаттардың санын санап білу де, оның  кемелдігін суреттеп танысу да мүмкін емес.  Аяттың келесі «Әй, мүминдер!» деген жалғасы кімдерге айтылған десек, олар Алла елшісіне  (ﷺ) салауат  айтуда алдына жан салмайтын жандарға бағышталған. Ондай болса Пайғамбарға (ﷺ) салауат айту – иманның артуында, иманның берік болуына себепші болып табылады. Сол үшін де Алла Тағала салауат айту бұйрығын иман келтіргендерге қаратып айтқан. Бізге жеткен хадисте Пайғамбырымыз (ﷺ): «Қиямет күні маған ең жақын адам – маған ең көп салауат айтқан адам» деген. «Оған салауат және ықыласпен сәлем келтіріңдер» деген бұйрық – Ислам үмметіне жүктелген міндеттердің бірі. «Аллаһым, Өзіңнің құзырында Өзіңнің Пайғамбарың Мұхаммедті кемел сипаттармен сипаттап, оған мақтау айт. Мадақтың ең кемел түрін соған арна», - деп елжіреп салауат айту – мұсылман үмметіне берілген ұлы бақыт. Осылай деп салауат айтқанымызда Алла біздің өзімізге де он рет салауат айтатынын кез-келген мұсылман адам біле бермейді. Алла елшісі (ﷺ): «Салләллаһу аләйһи уә сәлләм!» деген. Бізді мұсылман қылып, Пайғамбарға (ﷺ) салауат айта алу мүмкіндігін берген, сөйтіп, әр салауатымызға он есе жауап қайтарып, біздің де есімімізді періштелерінің алдында еске алып мақтаған мейірімді әрі ризығы кең Раббымызға шексіз мадақтар болсын! Алла елшісінің (ﷺ) мынадай хадисі бар: «Пайғамбарыңа салауат айтпайынша, дұғаң аспан мен жердің арасында бөгеліп, көтерілмей тұрады».  «Оған ықыласты түрде амандық тілеңдер!» деген бұйрық мағынасы: «Раббым, тірі кезінде оны әртүрлі апаттан, қиянаттан, қастандықтан сақтап, о дүниелік болса есендік бере гөр. Дінін сақтап, қияметке дейін ғұмыр бер. Сүннетін пәк етіп, тура жолдың кемелдігі ете көр», - деп дұға жасау. Бірақ, бұл аяттағы бұйрық қазақ тілінде осынша ұзын көлемді дұға жасау керек дегенді білдірмейді.  Бәлкім, Алла Елшісіне «Салләллаһу аләйһи уә сәлләм!» деп салауат айтып, мағынасын толық түсіну керек етіледі. Бұл сөйлем – аяттағы бұйрықтың толық орындалуына жетерлік сөйлем.

Маханбетчин Берік қажы Алпысбайұлы

«Жанқұтты би» мешітінің бас имамы