Аса мейірімді Алла Тағала сүйікті құлдарына құлшылығын арттырып, еселеп сауаптар алатын айтулы күндерді тарту еткен. Осынау Жаратушыға мейлінше жақындатып, Алланың разылығына бөленетін ерекше күндерді қалт жібермеген жан бақыттылардан. Зүл-Хиджа айының бастапқы 10 күні де Раббысының құлына берген үлкен сыйы.

Қасиетті күндерді қалай күткен дұрыс?

1. Шынайы құлшылық

Дін жолындағы адамға шынайы құлшылықтан асқан ғибадат жоқ әрі Раббысына қайта оралатынына көндігу де иманнан. Тәубе – екі дүниенің де жамандығынан құтқарушы.  Алла Тағала Құран Кәрімде бұл туралы былай дейді: «...Әй мүміндер, түгел Аллаға тәубе қылыңдар! Әрине құтыларсыңдар» («Нұр» сүресі, 31-аят).

1. Қасиетті күндерді қалт жібермеуге тастай бекіну

Мұсылман бұл күндердің игі істер мен жақсы сөздермен сәнін келтіруге тырысу керек. Жақсылық жасауға ниеттенген адамның Алла қашан да жолын жеңілдетеді. Алла Тағала өзіне шынайы болғанға қашан да әділетті. Әлемдердің Раббысы: «Сондай жолымызда күрескендерді әлбетте тура жолдарымызға саламыз. Рас Алла жақсылық істеушілермен бірге» («‘Анкәбут сүресі», 69-аят).

1. Күнәлардан бойыңды аулақ ұстау

Ғибадат Аллаға жақындата түссе, күнәлар алыстатып әрі Жаратушының меірімінен айырады.  Күәлар кешіріліп, тозақ отынан құтылу үшін, әлбетте Зүл-Хиджа айында да, басқа күндері де күнәлардан алшақ жүрген жөн.

1. Ораза ұстау

Алла Елшісінің (ﷺ) кей жұбайларының айтуы бойынша: «Алла Елшісі зүл-хижжа айының тоғыз күнінде, ашура күнінде және әр айда үш күн, сондай-ақ,  айдың дүйсенбісі мен бейсенбісінде ораза ұстайтын еді» (Әбу Дәуід, «Бәбу фи саумиль Ашар» – 2437-хадис).

Сүйікті Пайғамбарымыз өзінің асыл сөзінің бірінде: «Осы он күнде жасалған игі істен Аллаға сүйкімдірек игі іс жоқ, яғни (зүл-хижжаның) он күні...», -деген. Алла Тағала баршамызға игі істер істеуді нәсіп етіп, Раббымыздың разылығына бөленуге жазсын!

1. Игі іс жасау.

Осы он күнде жасалған игі істен Аллаға сүйкімдірек игі іс жоқ, яғни (зүлхиджаның) он күні...» (Әбу Дәуід, «Бәбу фи саумиль Ашар» – 2438-хадис.;  Ибн Мәжә – 1727)