Қасиетті құрбан айт кезінде Алла разылығы үшін құрбан шалу – ең алдымен дүниеқұмарлық сияқты жаман әдеттен арылудың таптырмас жолы. Адам баласы дәулеті артқан сайын пендешілікпен сараңдыққа салына беруі мүмкін.

Әбу Хұрайра (р.а.) жеткізген хадисте: «Бір кісі пайғамбарымызға (с.а.с) келіп: Қандай садақаның сауабы көп?» деп сұрайды. Сонда пайғамбарымыз (с.а.с) оған: «Денсаулығың мықты кезде бойыңды сараңдық билеп, байыған үстіне баюды көздегеніңде берген садақаның сауабы мол. Зекет пен садақаны жан алқымға келіп, өлім аузындағы сәтке дейін кешіктіруші болма. Өйткені өлген соң жиған-терген дүниең онсыз да жұртқа таратылады» деп жауап береді. (Бұхари, Зәкәт 11/уәсая 17;Мүслим, Зекет 92.)

Құрбан айтта құрбан шалудың сауабы мол және ол әл-ауқаты жеткен әр мұсылманға парыз. Сондықтан құрбан шалған адам, біріншіден, міндетін орындаған болса, екіншіден, сараңдықтан туындайтын ар-ождан азабынан құтылып, кедейлердің ақысын береді. Бір хадисте Пайғамбарымыз (с.ғ.с): «Расында Алла мұсылман байлардың малынан кембағалдарына жетерлік мөлшерін парыз еткен. Әлбетте, кембағалдардың аш-жалаңаш қалуы байлардың сараңдығынан. Қаперлеріңде жүрсін!Аллаһ оларды (байларды) қатаң сұраққа тартып, қатты азаптайды», -делінген.

Барлық әлемнің жаратушысы Алла Тағала шын ниетімен құрбан шалған құлын сый-құрметсіз қалдырмаған. Пайғамбарымыз хадисінде бұл ақиқатты былай деп түсіндіреді: «Адам баласы құрбан айт күнінде (құрбан шалып) қан ағызудан да сүйікті басқа іспен Алла Тағалаға жақындаған емес. Қа-ны ағызылған мал қиямет күні мүйіздері, тұяқтары және жүндерімен ке-леді. Ағызылған қан жерге тамбай жатып, Алла Тағаланың құзырында үлкен мақамға жетеді. Сондықтан құрбандарыңды көңіл ризашылығы-мен шалыңдар». (Тирмизи,Адахи,1.)

Облыстық орталық мешіттің баспасөз қызметі