Әсілінде, Құрбан айт–мұсылмандардың ұлық мерекесі.

Бұл күнде дүйім мұсылман қауымы бір-бірін Құрбан айт мерекесімен құттықтап, ерекше атап өту керек. Жалпы, құрбанның мағынасына келетін болсақ, құрбан араб тілінде «жақындау» дегенді білдіреді. Ал, шариғаттағы терминдік мағынасы «шарттарымен санаса отырып, құлшылық ниетімен мал бауыздау» дегенге саяды. Құрбан айт күндері (алғашқы үш күні) шалынатын мал арабша «ұдһия» деп аталады. Ислам діні адам баласын бір-бірін мейірімділікке, тақуалыққа, кедей-кепшікке жәрдем беруге шақыратын иләһи дін.

Құрбандық шалудың үкімі

Құрбан айтта құрбандыққа мал шалу Ханафи мазһабында (шамасы жеткендерге ғана) уәжіп амал. Ал, шамасы келмегендерге міндет емес. Шамасы келіп тұрып шалмаса, Пайғамбарымыз (с.ғ.с.) хадисінде: «Егер құрбан шалуға шамасы келіп тұрып шалмаса, ондай адам менің намаз оқитын жеріме жақындамасын»–деген.

Құрбан–ол Ибраһим (ғ.с.) сүннеті.

Алла елшісі (оған Алланың салауаты мен сәлемі болсын) хадистерінде Алла разылығы үшін шалынған құрбанның әрбір қылшығы үшін сауап бар екенін былай деп сүйіншілеген: «Сахабалар Пайғамбарымызға (с.ғ.с.): – Уа Алланың елшісі, құрбандық деген не?–деп сұрақ қойды.

–Құрбандық сендердің Ибраһим (ғ.с.) бабаларыңның сүннеті,–деді.

–Одан бізге қандай сауап бар?

–Әрбір тал қылшығы үшін сауап аласыңдар.

–Қойдың жүнінен ше? –Қойдың жүнінің әрбір тал қылшығына да сауап жазылады,–деді.

Ендеше, шалған құрбандықтарыңыз, құлшылық ғибадаттарыңыз қабыл болғай!

А.ТУКИТАЕВ,

Ақтоғай аудандық мешітінің бас имамы.