Бүгінде көшеде шашын  өсірген, тар шалбар киген, құлағына сырға, мойнына алқа таққан жігіттер мен ұлдарша шалбар киіп, шашын шорт кесіп, дөрекі сөйлейтін қыздарды көптеп кездестіреміз. Кейде олардың не ұл, не қыз екенін айырып болмайсың. Бұған шариғаттың үкімі  қандай?

Имам әл-Бұхари Ибн Аббастан «Алла елшісі әйелдерге ұқсаған ерлерді, ерлерге ұқсаған әйелдерді лағынеттегенін» жеткізеді. «Лағынеттеу» сөзінің мағынасы Алланың мейірімінен айырылу деген сөз, себебі бұндай қылық Алланың жаратылысын өзгерту болып табылады. Бұл жөнінде мынадай сөз бар: «Лағынеттелгендер Алланың жаратылысын өзгертетіндер». Мұндағы «лағынеттеу» саналы түрде әйелдерге ұқсайтын ерлерге, саналы түрде өз еркімен ерлерге ұқсағысы келетін әйелдерге қатысты айтылған. Ал егер ер адам табиғатынан дауысы жұмсақ, дене бітімі әйелге тән нәзік болса оның айыбы жоқ. Әйтсе де бұл кемшіліктердің орнын толтыруға, дұрыстауға тырысқаны жөн.

Хадисте: «Жұмаққа үш адам кірмейді: өзінің ата-анасын қинаған (оларға жаман қараған адам),   (дайюс) өз әйелін қызғанбайтын, басқа ерлермен оңаша қалғанда да назар аудармайтын адам және ерлерге ұқсаған әйелдер». Осы хадистің басқа бір нұсқасында:  «Үш адам ешқашан Жұмаққа кірмейді: (дайюс) ерлерге ұқсаған әйелдер және үнемі ішімдік ішетіндер»-делінеді. Сахабалар: «О Алланың елшісі, маскүнемнің жайын білеміз, ал даюс деген кім?» - деп сұрайды. Пайғамбарымыз: «Ол үйіне кіргендерге назар аудармайтын адам яғни өзі үйінде жоқ болғанда әйеліне бөгде ерлер келсе еш қызғаныш танытпайтын адам Сонда сахабалар: «Ал ерлерге ұқсаған әйелдер деген кімдер?»-деп сұрайды, Пайғамбарымыз (с.ғ.с): «Ерлерге ұқсағысы келетіндер»-деген екен.

Сондай-ақ ер адам әйелінің ерлерге ұқсауына алып келетін барлық нәрсеге тыйым салуы міндет.  Мәселен, ерлерше жүру, ерлерге тән спорттық киім кию және т.б.Себебі әйелінің киімі мен киіну үлгісіне ер адам жауапты. Егер ері әйелінің ерлерше жүріп-тұрғанына қарсылық білдірмесе, оған тыйым салмағаны үшін жауапты болады. Құранда: «О сенім келтіргендер, өздеріңді және отбасыларыңды Тозақтың отынан қорғаңдар»-дейді. Алла елшісінің хадисінде: «Әр ер адам өз отбасының бақташысы және ол алдындағылар үшін жауапты»-дейді.

Имам Әбу Дәуіт: «Бірде Айшадан: «Ерлердің шәркесін киетіндер туралы не ойлайсыз»-деп сұрағанда Айша: «Алла елшісі ерлерге ұқсаған әйелдерді лағынеттеген»-деп жауап берді. «Лағынеттелген» деген сөздің өзі жазасы ауыр күнәні білдіреді.

Күні бүгін осындай қылықтардан естір құлаққа жаман «қызтеке», «көгілдір» деген сөздердің шығып жатқаны да жасырын емес. Бұл қоғамның дерті. Дін мен ділге, ұлт пен рухани құндылықтарға қауіп төндіретін мәселеге алып келеді. Міне сондықтан да әр ер адам өзінің жары мен балаларының дұрыс киініп, дұрыс жүріп-тұруына септесер болса күні ертеңге салиқалы қоғамның кепілі болмақ. Аталған сан алуан мәселелерден қорғайтын, сақтайтын Алланың бұйрығына бойұсынуды, шариғат заңдарын сақтауды, Пайғамбар жолымен жүруді естен шығармасақ екен. Сонда ғана адам баласының қор болмайтыны анық.

Қарағанды облыстық орталық мешіті

Әмина Омарова