Бүгінде балаға қатысты қандай құқықтары мен міндеттері бар екенін білмейтін ата-аналарды, жас жұбайларды жиі жолықтырамыз. Ата-ананың, әкенің бала алдындағы міндеттері туралы көп айтуға болады. Соған қысқаша тоқталсақ. Пайғамбарымыз (с.ғ.с): «Әкенің бала алдында үш міндеті бар»-деген:

1. Балаға жақсы ана таңдау, яғни жақсы жар.
2. Жақсы есім беру.
3. Құранды (дінді) үйрету.

Отбасын құру – жауапты қадам. Отбасын құратын әр адам бұған дейін тек өзіне жауапты болса отбасын құрғаннан кейін бірнеше жанның жауапкершілігін мойнына алады. Жар таңдаған әр жігіт тек әйел ғана емес, әрі досын, әрі болашақ балаларының анасын таңдайтынын түсінуі керек. Көпшілігі болашақ баласының аналары қандай болатыны туралы ойлана бермейді, үйленер кезде тек өзінің көзін қуантатын, көңілінен шығатын жар таңдайды, ол кезде тек сұлулыққа мән береді. Ал отбасын құрып, жігіттік желік басылған кезде байсалды байыпты жарды, мейірімді ананы, пысық әйелді іздей бастайды. Міне о тұста дұрыс таңдау жасамағандықтан, о баста барлығын жан-жақты ойламағанадықтан отбасында ыдыс-аяқ сылдырлап ұрыс-керіс шыға бастайды.

Мұхаммед Пайғамбарымыз: «Бақытты адамның төрт белгісі бар:

1. Тақуа жақсы әйел.
2. Жақсы балалар.
3. Айналасында тақуа адамдардың болуы.
4. Азық-ауқатына қаражатты өз тұрған жерден тауып, басқа жаққа бармауы»-деген.

Адам орта жасқа жеткенде, балалары өскенде ғана Пайғамбар сүннетімен бала тәрбиелеудің маңыздылығын түсінеді. Өйткені өскен бала өкіндірер болса бүкіл ғұмырдың текке өткені емес пе? Қазақ «Бала берсең сана бер, сана бермесең ала бер» дейді. Бұл тегін айтылған сөз емес. Адам баласының осы өмірдегі негізгі мақсатарының бірі өзінен кейін ұрпақ қалдыру. Ал ұрпағының саналы, салиқалы болуы бақыт, керісінше болуы бақытсыздық. Жас күнінде қызық, сұлулық іздеген адам күні ертең баласы өскенде о бастағы таңдауының дұрыс не бұрыс болғаны жөнінде ойлана бастайды. Бала адам өмірінің мәні. Ол адамның жемісі, жетістігі. Суығына тоңып, ыстығына күйіп өсірген бала көңіліңізді қалдырып жатса өкініші кімге? Демек ең әуелі Алладан сылқым сұлу емес, салиқалы әйел, саналық ұрпақ нәсіп етуді сұрап, содан кейін жақсы жар таңдауға, баланы дұрыс тәрбиелеуге күш салып, амал жасау қажет.

Пайғамбарымыз: «Алланың құлы осы дүниеден өткенде оның үш ісінен басқа іс-амалдарының бәрі тоқтайды»-деген:

1. Берген садақасы.
2. Өзінен кейінгі қалдырған пайдалы ілімі.
3. Өзіне дұға жасап, күні ертең құран бағыштайтын тақуа баласы.

 «Алланың жазасынан қорқып, мейіріміне үміттеніп, құдды күні ертең осы әлемнен өтетіндей құлшылық жаса, ал осы әлемде өз өміріңді мәңгілік өмір сүретіндей етіп өткіз, адал жолмен азық тап, мұқтаждарға көмектес, барлығын Алланың разылығы үшін жаса»-дейді емес пе дініміз? Ендеше әр ісімізді Ислам шеңберінде жасауға дағдыланайық, Исламда – бақыттың тұнығы бар!

Қарағанды облыстық орталық мешіті

Әмина Омаров