Мұсылман ер азамат неке қиып, шаңырақ көтергеннен кейін отбасының ішкі және сыртқы шекараларының сақталуына толық жауапкершілік алады. Және бұл жұбайы мен балаларын материалдық тұрғыдан қамтамасыз ету ғана деген сөз емес.

Біріншіден ер адам отбасы мүшелерінің рухни құндылықтары мен адамгершілік мінез-құлқына кері әсер ететін түрлі қауіптерден жақындарын қорғауы қажет. Бұған мысал үшін күмәнді таныстармен қарым-қатынас жасау, түнгі уақыттағы, қауіпті жерлердегі серуен, рухани шыңдалуға кері әсер ететін, адамды жаңылыстыратын түрлі басылымдар мен кітаптар, теле және радиобағдарламаларды және т.б. жатқызуға болады.

Ер мұсылман шариғат үкімдерін қатаң сақтауы керектігі белгілі, және оның қазіргі уақытта тіпті де қиын екенін білеміз. Жұмыста – аралас ұжым, әйел заты әр адым сайын қасынан табылады, жұмыста да, қоғамдық көлікте де, көшеде де және олардың басым бөлігі ашық-шашық киінеді. Ер адамға мұндай жағдайда нәпсісін тыю да қиын болатыны анық. Сондықтан мүмкін болса қолайлы жұмыс ортасында еңбек етіп, көзін, тілін зинадан сақтағаны дұрыс. Егер өзі жұмыс беруші болса, ұжымда шариғат талаптарына қайшы келмейтін жағдайды ұйымдастыру, мысал үшін ерлер мен әйелдер үшін жеке жұмыс кабинеттерін жасақтау қажет.

Ал үйге келгенде мұсылман ер азамат өзінің жағымсыз эмоцияларын есік сыртында қалдырып, өзінің бала-шағасына білдірмеуге тырысқаны абзал. Олармен қарым-қатынаста мейірімді болу керек. Тіпті қателерін де жекірмей, ұрыспай түсіндіруге тырысқан жөн.

Үйдің иесі, отағасы болғандықтан ол отбасына басшы. Дұрыс тәртіп орнатып, оларды бірлікте ұстау ер азаматтың қолында деген сөз. Және отбасының сырына берік болу әркімге қажет. Мұхаммед Пайғамбарымыз мұсылман ер азаматтың өз жұбайының кемшіліктерін басқалардан жасыруы керектігін ескерткен. Қазақ мұны «Жаманын жасыру, жақсысын асыру»-дейді.

Бірақ үйдегі дін талаптарына қайшы келетін іс-әрекеттерге қатаң тыйым салу қажет. Жұбайы мен балаларының шариғат талаптарын орындауын қадағалаған жөн. Олардың діни білім алуын, құлшылық жасауын қамтамасыз ету керек. Ең алдымен өз отбасы мүшелеріне үлгі болуы тиіс.

Отбасылық сұрақтарды ер азамат жұбайымен ақылдасып шешкені жөн және оған шектен тыс міндет артпағаны абзал. Жақсы мұсылман жұбайына бала тәрбиесінде де, үй шаруасында да көмектеседі. Мұндай қарым-қатынас отбасының шаңырағын бекіте түседі. Хадистердің бірінде: «Сендердің араларыңдағы жақсыларың, жұбайларына жақсы қарайтындарың»-делінген. Және әр ер азамат өз жұбайын бөгде ерлердің бөтен көзқарасынан қорғауы, сақтандыруы тиіс.

Әрдайым тақуа мұсылман әрдайым өзінің жұбайы мен балалары үшін дұға жасайды.