Ислам дінінде ер мен әйелдің некесі қасиетті саналады. Әр қайсының отбасында өзіндік рөлі бар. Олар сол міндеттерін атқара отырып отбасында шаттық орнауын, іргесінің берік болуын қамтамасыз етеді.  Отбасындағы махаббат сенімді күшейтеді, ерлі-зайыптылардың Аллаға деген махаббаты қаншалықты болса, бір-біріне деген сүйіспеншіліктері де соншалықты артпақ. Әр әйел отбасында бақытты болғысы келеді. Ерінің өзін бағалағанын және өзіне риза болғанын қалайды. Ері риза болған әйелге Алла разы болмай ма? Жақсы жар қандай болу керек? Мұсылман әйелге өз ерін қалай бақытты етуге болады?

1. Жиі дұға жасаңыз

Дұға мен құлшылық – бұл барлық дерттің емі және әр істегі жетістік кілті. Отбасындағы дұға иманды күшейтіп, ерлі-зайыптылар арасын бекіте түседі. Шынайы құлшылық дін міндеттерін сақтаудан білінеді, сондықтан шынайы сенім келтіргендер тақуа болып табылады. Дін міндеттерін орындаған тақуа әйел шайтанның тура жолдан тайдыруына жол бермейді. Дұға – бұл барақат пен бақыттың кілті, Жаратқанға жақындатар жол. Алладан өз некеңізді жарылқауын, отбасыңызға бақыт пен өзара түсіністік беруін сұраңыз.

2. Еріңізді және оның құқын сыйлаңыз, өз құқыңыз бен орныңызды біліңіз.

Ер мен әйелдің арасында физикалық, психологиялық айырмашылықтар бар және бұл айырмашылықтар олардың рөлі мен міндеттеріне тікелей әсер етеді. Отбасындағы ер мен әйелдің құқықтарына қатысты Пайғамбар сүнетті мен Құранды зерделеңіз. Өз құқыңыз бен еріңіздің құқын толық біліңіз. Мұсылман ерлі-зайыптылар өздеріне Алла берген құқықтарын сақтауы тиіс. Тақуа әйел – бұл біріншіден Алланың бұйырғанына бойұсынатын және өзінің еріне адал болып, оның құқықтарын өзінікінен жоғары қоятын әйел. Өз еріңізді және оның құқықтарын сыйлаңыз.

3. Еріңізге әрдайым қолдау танытыңыз.

Әйелі ерінің негізгі тірегі, жігер беруші жан. Ері әр істе әйелінен үлкен қолдау күтеді. Қиындық пен қуанышта қасында болып, бөлісе  біліңіз. Мұсылман әйел ері мен өзіне жүктелген жауапкершілікті түсініп, еріне тірек болуға тырысады. Еріне қамқорлық жасайды, ерінің жігері жаншылмауы, намысы тапталмауы үшін үлес қосады. Еріңізді әрдайым қолдаңыз.

4. Еріңіздің көзін қуантыңыз

Тақуа әйел – Алланың ер азаматқа берген жақсылығы, осы өмірдің қызығы. Ол оған қолдау білдіреді, тыныштық пен рахатқа бөлейді. Бұның қасында басқа рахат салыстыруға келмейді. Мұхаммед Пайғамбар: «Мына дүние уақытша пайдалануға берілген, бұл дүниеден пайдалануға алатын ең жақсысы ол тақуа әйел»-деген.  Үйде жинақы, тап-тұйнақтай, әдемі болып жүріңіз, еріңіздің көзін қуантыңыз. Әйеліне көзі тойған, көңілі риза болған ер адам өзінің жарын бақытты етуге тырысады.

5. Қолыңызда барға қанағат етіңіз

Еріңіздің мүмкіндігінен жоғары нәрселерді талап етпеңіз. Тақуа әйел ері мен оның байлығына көңілі толмайтынын білдірмеуі тиіс. Алла Тағала сіздің еріңізге не берсе соған шүкірлік етіңіз. Бұл Алланың бергеніне және бұйырғанына бойұсыну болмақ. Қиын жағдай туындағанда еріңізге ашуланбаңыз, керісінше оған қолыңыздан келгенше көмектесіңіз, қиындықтан шығудың жолын бірге іздеңіз. Себебі еріңізге ашуланғаннан еш пайда жоқ, керісінше ерлі-зайыптылар бір-біріне түсіністік танытып, сабырлықпен мәселелерін шешкенде ғана Алланың разылығына бөленбек.

6. Ол жұмыстан келгенде жылы шыраймен қарсы алыңыз.

Жоғарыда айтылғандай ері әйелінен тыныштық табуы керек. Яғни тірліктің дүниеәуи шаруаларынан тынығуы тиіс. Оған күні бойы шаршап-шалдығып, армандаған жан тыныштығын сыйылаңыз. Қабағыңыз ашық болсын. Мұндай әйелді кез-келген ердің сыйлайтыны анық, сонымен отбасындағы қарым-қатынас беки түседі. Еріңізге жан жылуын беруді де естен шығармаңыз. Күлімсіреп жылы шыраймен қарсы алу – бұл сүннет, ал еріне күлімсіреп жылы шырай таныту – екі есе сауап болмақ.

7. Үй шаруасына ұқыпты болыңыз

Жиналған үй, таза пәтер, дәмді ас – сіздің еріңіздің сөзсіз көңілін қуантады. Өзі жоқта үйге ие бола алатыныңызға толық сенімді болып, жұмысымен алаңсыз шұғылдана алады. Әйел – ошақ қорғаны. Ал үй – бұл ер адам үнемі асығып тұратын мекен болуы тиіс. Жақсы әйел үйде береке-бірлік тыныштық, жайлылық  орнатуы тиіс.  Хадисте: «әйел ерінің үйіне жауапты, және сол үшін сұралады»-делінген.

8. Ашуға бой алдырмаңыз

Ұрыс-керіс пен ашу отбасының шаңырағын шайқалтып, ерлі-зайыптылардың арасын алшақтатады. Шайтанның ықпалына түсіп кетпеңіз. Оның еркіне көніп, отбасыңыздың берекесін алмаңыз. Түсінбестік туындағанда сабыр сақтап тынышталуға, содан кейін барып сөйлесуге тырысыңыз.

9. Еріңізге ренжімеңіз

Отбасылық өмірде де өкпе-реніш болатыны заңдылық. Бірақ өкпеңізді ұзақ сақмаңыз. Кешіре біліңіз. Еріңіздің кейбір кемшіліктері мен қателіктеріне көз жұма біліңіз. Себебі кемшіліксіз адам жоқ, әр адамның іс-әрекетінде мін болады. Өкпе-реніштеріңізді неғұрлым тезірек ұмытуға тырысып, еріңіздің есіне сала бермеңіз.

10. Еріңіздің туысқандарымен тығыз қарым-қатынас орнатыңыз

Ерін сыйлайтын тақуа әйел оның туысқандарын да құрметтейді. Әр ер адам өзінің жұбайы мен туысқандарының арасындағы жақсы қарым-қатынасқа тек қуанары сөзсіз. Бұл да өз кезегінде оның әйеліне деген ризашылығын, сүйспеншілігін арттыра түседі. Ал жиі орын алатын дау-дамай ер адамды да, жұбайы мен жақын туысқандарын да шаршатары анық. Бұл ерлі-зайыптылар арасын тек алшақтатпаса, еш қайыры жоқ. Қарағанды облыстық орталық мешіті

Әмина Омарова