«Ұяттылық -  әлсіздік, жасықтық қасиет ретінде қабылданып жатады, бірақ ол адамның - күші, мінез-құлқының көркемдігі».

Л.Н.Толстой

Қазір әлем аспан айналып жерге түскендей күйге енген, айналасы аз ғана уақыттың ішінде құндылық ретінде бағаланған бар қасиет кемшілік ретінде қабылданатын болды. Қоғам түсінігі өзгеше. Мысал үшін, ұят, әсіресе қыз баланың ұяңдығы деген түсініктер санадан шығып қалуға шақ. Өмірде белгілі бір жетістіктерге қол жеткізуде еңбасты кедергі осы ұят пен ұялшақтық дейміз. Ұятты адамды – тұйық, өз-өзіне сенімсіз адам ретінде қабылдайтын болдық.

Алла елшісі: «Сенімнің жетпіс бұтағы бар. Ең жоғарғысы – Алладан басқа Тәңір жоқ, Мұхаммед оның елшісі деп айту. Төменгісі – жолдағы кедергіні алып тастау. Ұят – ол да сенімнен»-деген.Байқағанымыздай, Алла елшісі сенімнің 70 бұтағының ең жоғарғысы мен төменгісін атап, қалған алпыс сегізінің ішінен ұятты  айтады. Бұның өзінде даналық жатыр емес пе?

Бір мұсылман ғұламасы ұяттың мықты адамдарға, жасықтықтың әлсіздерге тән екенін айтыпты. Демек ұят пен жасықтық мүлде екі түрлі қасиеттер. Біз көп жағдайда осы екеуін ажырата алмай жатамыз. Ұятты жоғалту арқылы, иманымызды жоғалтамыз. Ибн Аббас: «Ұят пен  иман бір жерде, егер бірі кетсе, екіншісі де кетеді»-деген екен.

 Әйел затының ұяттылығы қайдан көрінеді?

Ұяттылық әйел баласының ең көркем қасиеттерінің бірі. Ұятсыз әйел өзіне тән барлық қасиетін жоғалтады.     Әйел затының ұяттылығы оның жүріс-тұрысынан, киімінен, сөйлеу мәнерінен көрінеді. Демек ұят әйелдің ажырамас серігі болуы тиіс. Әйел баласы қайда болсын, әсіресе бөгде ер азаматтардың көзіне тік қараудан сақтануы қажет. Себебі шайтан көз зинасына жол ашады. Ұят оның қарапайым киінген сырт сипатынан көрінуі тиіс. Бұл әйел баласының соңынан сөз ермеуіне кепіл, әрі бөгде ерлердің назарын аудармауға амал болады. Сондай-ақ Алла Тағаланың қарапайымдылықты жақсы көретіні бәрімізге аян. Және ең бастысы, бүгінде ұмытуға айналған нәрсе ол әйелдің сөйлеу мәнері. Адамның сөзі ол адам туралы көп хабар береді. Өкінішке қарай аңдап сөйлейтін, айтар сөзін ой елегінен өткізіп барып айтатын адам кемде-кем. Қазір аузына не келсе соны «тура айтамын» деген желеумен жасқанбай айта салатын болдық. Бұл өз кезегінде көптеген мәселелерге алып келеді. Біреудің көңілін қалдырады, күнәсін көбейтеді, ерінің абыройын түсіреді, өзінің сыйын кетіреді. Бұның бәрі «Басқа пәле тілден екенін», «Күнәнің тоғызы тілден» екенін айғақтайды.

Пайғамбарымыз (с.ғ.с): «Ұят – сенімнен, ал сенім Жұмаққа жеткізеді. Ұятсыздық – рақымсыздық, ал рақымсыздық -  Тозаққа жетелейді»-деген.

Ұятта тек қайыр бар. Ұят болмаған жерде азғындық орын алады. Оны мың құбылған мына әлемде орын алып жатқан жантүршігерлік жағдайлардан-ақ көруге болады. Осының бәрі ұят кеткеннен, сенім кеткеннен орын алатын дүниелер.

Ал әйел баласының ұяттылығы – алтынмен өлшенбейтін қасиет. Ол әйелдің дәрежесін ғана көтереді. Ендеше Алла ұятты болуды нәсіп етсін дейік!

Қарағанды облыстық орталық мешіті

Әмина Омарова