Бүгін біз көптеген аға-бауырларымыз назар аудара бермейтін жайттар туралы, дәлірек айтқанда ерінің әйеліне қатысты қарым-қатынасы жөнінде айтқалы отырмыз. Алла елшісінің (Оған Алланың рақымы мен шапағаты болсын) хадистері мен, Исламның ұлы адамдарының өмірінен мысалдар келтіріп, ғұламалардың отбасылық өмірге қатысты пікірлерін жеткізсек дейміз. Бәз бір жігіт ағалары үйленгеннен кейін алған жарын ұрып-соғуға, қорлауға болатын сұрауы жоқ «күң» алғандай көреді. Ең жаманы олар осы қылықтары арқылы өзінің күштілігін көрсетеміз деп санайтындығы. Алла Тағала бір саты жоғары жаратқан ер азамат болғаннан кейін нәзік жандыларды өздерінен кем көріп, төмен санайтындары өтірік емес. «Сендердің ең жақсыларың өз отбасына мейірімді болғандарың, және мен де сендерден гөрі өз отбасыма жақсы қараймын»-деген Пайғамбарымыз (с.ғ.с). Хадистің басқа бір нұсқасында «Сендердің ең жақсыларың әйелдеріңе жақсы қарағандарың» делінеді. Бірде Пайғамбарымыздан әлдекім: «Кімнің сенімі ең шынайы?» - деп сұрағанда, Ол: «Өз отбасына жақсы қараған адамның» - деп жауап берген екен. Басқа бір хадисте «Әйелдерге жұмсақ қараңдар» делінеді. Бір мүмін Айша анамыздан (Алла оған разы болсын): «Сіз Пайғамбарымызбен қалай бірге отырасыз? Біз Оның қасында отырғанда бас көтеріп жүзіне қарай алмаймыз» - деп сұрағанда, Айша анамыз: «Пайғамбарымыз  үйде бізбен бірге күліп, тамақтанып жадырап отыратын, үйді жинастыруға көмектесетін»-деп жауап берген екен. Айта берсек Алла елшісінің отбасында ас әзірлеуге, үйді жинауға, киім жууға қалай көмектескені жөнінде қаншама хадисті мысалға келтіруге болады. Алла елшісінің отбасылық өмірде қандай болғанын біле тұрып  бізге де біраз жайттар туралы ойлану керек шығар. Тағы бір мысал келтірейік. Бірде әлдекім өз жұбайының жағымсыз қылықтары жөнінде айтуға Умарасхабқа келеді. Умарасхатың халиф болып тұрған кезі. Әлгі адам оның үйіне жақындап келіп тоқтайды. Сонда Умарға әйелінің қалай ұрысып жатқанын естиді. Сөйтіп «әл-хаттабтың ұлы Умардың күні  мынадай болса, маған не жоқ» деген оймен кері бұрылып, кетуге ыңғайланады. Сол кезде үйден Умарасхаб шығып, әлгі адамнан не себепті келгенін сұрайды. «О мүміндердің әміршісі, мен өзіңе әйелімнің үстінен шағым жасағалы келіп едім, бірақ сіздің әйеліңіздің сөздерін естіп, мүміндердің әміршісі Умардың жағдайы осындай болса менікі туралы не айтуға болады  деп кері қайтып бара жатыр едім» -дейді.  Сонда Умар: «Жұбайымның маған қатысты өзіндік құқықтары бар. Менің ұрысқанын сол себепті көтеремін. Өйткені ол мен үшін ас дайындайды, нан пісіреді, менің балаларымды тамақтандырады. Бұл істің бәрін ол істеуге міндетті емес»-дейді. Сонда әлгі кісі «О мүміндердің әміршісі менің де әйелім осындай» дейді. Сол кезде Умар: «Онда шыда бауырым, бұл ұзаққа созылмайды» деген екен. Және бұл адам Умарасхаб – жүзіне шайтан қарауға қорқатын тұлғаның өзі болған. Осыдан ақ түйін шығаруға болады емес пе? Алғашқыда Адам ата жұмақта жалғыз болған деседі. Ол ұйқыда жатқан кезінде Алла тағала оның қабырғасынан Хауа ананы жаратыпты. Алла тағала Хауа ананы Адам атаның қабырғасынан жаратқан кезде еш ауырлықты сезбейтіндей жаратқан. Егер керісінше болғанда ерлер ешқашан әйел затына жақын болмас еді. Керісінші жек көру сезімі болар еді. Адам ата ұйқыдан оянған кезінде қасында отырған Хауа ананы көріп, «Кімсің» деп сұрайды: Сонда Хауа ана: «Мен сенің Алла жаратқан жұбайыңмын, Алла бізді бір-бірімізден тыныштық табу үшін жаратты» дейді. Бұл әңгіме «Равзат уль-Азхар» кітабында айтылады. Осы мақаламыздың келесі жалғасында біз ерінің әйелін не нәрсеге үйретуі, неден сақтануы керектігі жөнінде айтатын боламыз. Жалғасы бар...