Зүбәйр ибн Аууамен некелескен хазірет Әбу Бәкірдің қызы хазірет Әсма ұлы Абдуллаһқа жүкті болатын. Хижрет туралы бұйрық келген соң айы-күні жетіп отырғанына қарамастан ол да жолға шығып, шамамен бес жүз шақырымдық жолды жүріп өтіп, Құбаға дейін келеді. Мәдинаға жақындап қалғанда толғағы басталып, сол жерге тоқтауға мәжбүр болады. Көп өтпестен хазірет Әсма маңдайынан нұр шашқан, езуінен күн күлген, шекесі торсықтай ұл баланы дүниге әкеледі. Олар қатты толқиды, өйткені бұл Мәдинаға келген күндерінен осы кезге дейін мұхажирлардың алғаш дүниеге келген баласы болатын. Пайғамбарымыз бұған қатты қуанады. Кішкентай сәбиді қолына алып, атын Абдуллаһ деп қойды. Сосын қасындағылардан бір құрма әкелуді сұрады. Құрманы алып, аузына шайнағаннан кейін сәбиге дәм татырды. Артынша сәбиге береке мен тыныштық тілеп, дұға етті. Сайтқа дайындаған: М.Қуандыққызы