Қарағанды облысы Шахтинск қалалық «Нұр» мешітінің имамы Әбілхайыр Кәсенұлының ұйымдастыруымен қасиетті Рамазан айының алғашқы күнінен бастап «Тегін такси» қайырымдылық акциясы жүзеге асырылып келеді.

Игі бастамаға мешіттің ерікті жамағаттары қолдау білдіріп, тарауих намазынан кейін қариялар мен үй-жайы мешіттен алыс орналасқан тұрғындарды үйлеріне тегін жеткізіп беруде. Бұл акция әсіресе түнгі уақытта мешітке келіп, құлшылық жасағысы келетін үлкен кісілер мен жаяу қатынауы қиын жандарға үлкен жеңілдік болуда.

Қайырымдылық шарасының басты мақсаты – Рамазан айында жамағатқа қолайлы жағдай жасап, сауапты іске үлес қосу. Осындай игі амалдар арқылы мешіт жамағаты бір-біріне жанашырлық танытып, қоғамда мейірім мен ынтымақтың артуына үлес қосуда.

Ұйымдастырушылар бұл сауапты істі Рамазан айының соңына дейін жалғастыруды жоспарлап отыр.