Қасиетті Рамазан айында Шахтинск қалалық «Нұр» мешітінде қайырымдылыққа бағытталған «Бір мәселені шешу» жобасы жүзеге асты. Аталған игі шараның мақсаты – мұқтаж жандарға қолдау көрсетіп, олардың өміріндегі бір қиындықты шешуге жәрдемдесу.

Жоба аясында жалғыз басты анаға қаржылай көмек көрсетілді. Бұл көмек отбасының тұрмыстық жағдайын жеңілдетуге бағытталды. Қайырымдылық шарасы мешіт жамағатының бірлігі мен жанашырлығын айқын көрсетті.

Мешіт ұжымы қасиетті Рамазан айында жасалған әрбір сауапты істің маңызы зор екенін атап өтіп, жамағатты игі амалдарға белсенді қатысуға шақырды. Осындай қайырымдылық шаралары алдағы уақытта да жалғасын табады деп жоспарлануда.