Қасиетті Құран Кәрімде: «Біз сендерді қорқыныш, аштық, дүние-мүліктеріңді кеміту арқылы сынаймыз»-делінген.

        Өмір болған соң адамның басына әр түрлі іс түседі. Дертке шалдығуы, қайғылы оқиғаға тап болуы, қарызға батуы мүмкін және т.б. Осындай кездері Алла елшісінің мына сөздерін естен шығармау қажет: «Шынында үлкен қиындықтан үлкен сауап бар. Осындай қиын сәтте разылық танытатын адам Алланың разылығына ие болады. Разылық танытпаған адам Алланың разылығына ие болмайды»-деген.

        Ахмад мынадай хадисті жеткізген: «Бәрінен бұрын Пайғамбарлар, содан кейін жақсылық жасаушылар, содан кейін соған ұқсайтындар көп сыналады».

Сынақтың адамға пайдасы:

1. Күнәлар кешіріледі;
2. Адамның о дүниеде Алла Тағаланың алдындағы дәрежесі өседі;
3. Алланың алдындағы парыздарын дұрыс атқармағандығын түсініп, осы үшін өзін жазғырады;
4. Алланың алдында дәрменсіз екенін біледі, өкінеді, тәубесіне келеді;
5. Адамның Жаратушымен байланысы күшейеді;
6. Бақытсыз, бейшара адамдарды есіне алып, олардың қиындығын түсінеді;
7. Алланың жазғанына сенімі күшейіп, жақсылықтың да, жамандықтың да Алладан екенін түсінеді;
8. Дүниенің жалғандығын түсініп, мәңгілік өмірді есіне алады.

Басына қиындық түскен адамдар үш санатқа бөлінеді:

1. Жақсылықтан құр қалушылар – бұл басына түскен әр қиындықты ашумен қарсы алып, Алла Тағалаға разылық танытпайтындар;
2. Қиындықты сабырмен қарсы алатындар;
3. Қиындықты Алла Тағаланың жазғанына разылық танытып қарсы алып, осы қиындық арқылы күнәлары кешірілетініне қуанатындар.

     Сенім келтірген адам үшін әр істе қайыр бар. Алла елшісі: «Мұсылман үшін әр істе жақсылық бар. Егер оған қуаныш келсе разылық танытады және бұл үшін оған жақсылық бар. Егер қиындық түссе сабырлылық танытады және бұл үшін оған жақсылық бар»-деген.  Адам қиындықта ашуланып, Алла Тағаланың жазғанына риза болмай, тағдырына налып жатса күнәсін, жағдайын одан сайын ауырлатқаны. Пайғамбарымыз: «Шынында сабыр қиындықтың алғашқы сәтінде көрінеді»-деген. Ал біз көбінесе керісінше жасаймыз. Алдымен ашуланып, іштегі бар ашу-ызамызды шығарып, балағат сөзімізді айтып, кәрімізді төгіп,  адамдарды ренжітіп болғаннан кейін өкініп тәубемізге келіп жатамыз.

Қиындыққа тап болған адамға не істеу қажет?

1. Барлық істің Алла Тағаланың қалауымен болатынын түсіну және сабыр қылу;
2. Шариғат талаптарын ұстанып, Алла тағаланың қалауына бойұсыну;
3. Алла Тағаладан кешірім сұрап, тәубесіне келу, үміт ету қажет.

Пайғамбарымыз (с.ғ.с): «Қиямет күнінде қиындық көрмеген адамдар басына қиындық түскен адамдардың алып жатқан сауабын көріп, осы өмірде тәндерін қайшылағанын қалайды»-деген.

Ендеше Алланың қалауына қарсы келмей, бойұсынып, әр істе сабырлылық танытайық!

Қарағанды облыстық орталық мешіті

Әмина Омарова