Қазақстан мұсылмандары діни басқармасының Қарағанды қалалық «Ар-Рахман» мешітінде «Мектепке жол» қайырымдылық акциясы аясында «Қайырымдылық керуені» атты игі іс-шара ұйымдастырылды.

Шара барысында жаңа оқу жылына дайындық кезеңінде әлеуметтік қолдауды қажет ететін 25 балаға мектеп сөмкелері мен қажетті оқу құралдары табысталды.

Игі бастаманың басты мақсаты – балаларға қолдау көрсетіп, олардың жаңа оқу жылын қуанышпен бастауына мүмкіндік жасау, білімге деген құштарлығын арттыру.

Қайырымдылық – жүректен шығатын ізгілік. Бір балаға жасалған жақсылық – оның болашағына жасалған үлкен қолдау. Осындай игі шаралар қоғамдағы мейірімділік пен өзара жанашырлықты арттыруға, балаларға қамқорлық көрсетуге бағытталғаны атап өтілді.

Шара соңында бүлдіршіндерге жаңа оқу жылында сәттілік тілеп, білім жолындағы әр қадамына береке мен жетістік тіленді.