Қарағанды қалалық «Ар-Рахман» мешітінде дәстүрлі бейсенбілік рухани уағыз-насихат кеші ұйымдастырылды.

Кездесу барысында жамағатқа «Ислам және адал қоғам» тақырыбында тағылымды насихат айтылды. Уағызда адалдық ұғымының Исламдағы орны кеңінен түсіндіріліп, оның адам мен қоғам өміріндегі маңызы сөз болды.

Уағызда сөйлеуші адалдықтың сауда-саттықта, еңбекте, өз міндетін орындауда, өзгемен қарым-қатынаста көрінетінін атап өтіп, Пайғамбарымыз Мұхаммедтің (оған Алланың игілігі мен сәлемі болсын) «әл-Амин» — «сенімді, адал» деген атпен танылғанын мысалға келтірді. Адал қоғам — жеке адамның ары мен ұяты, әр мұсылманның Аллаһ алдындағы жауапкершілігінен басталатыны түсіндірілді.

Сонымен қатар парасаттылық, өтірік пен алдаудан аулақ болу, аманатқа қиянат жасамау, өзгенің құқығын аяққа таптамау секілді қасиеттердің қоғамдағы сенім мен бірлікті нығайтатыны, ал адалдықтан ауытқу — отбасы мен қоғамның іргесін шайқалтатын үлкен қауіп екені ерекше атап өтілді.

Жиын соңында жамағат көкейдегі сұрақтарын қойып, тақырып аясында пайдалы мәліметтермен сусындады.

Мұндай рухани кездесулер қоғамда адалдық пен әділдік құндылықтарын нығайтуға, дұрыс діни түсінік қалыптастыруға және жастардың саналы тәрбиесіне оң ықпал ететіні атап өтілді.