ҚМДБ-ның «Шариғат және пәтуа» бөлімінің маманы, Республикалық ақпараттық-насихат тобының мүшесі Медет Құрмашұлы Қарағанды қаласындағы Әл Ғаффар мешіті жамағатымен кездесіп, «Дін мен дәстүр» тақырыбында насихат жүргізді.

Кездесу барысында спикер ислам дінінің құндылықтары мен халқымыздың ғасырлар бойы қалыптасқан салт-дәстүрлерінің өзара сабақтастығы жөнінде кеңінен баяндап, ұлттық болмыс пен рухани мұраны сақтау мәселелеріне тоқталды.

Насихат барысында дін мен дәстүрдің бір-біріне қайшы емес, керісінше ұлттың рухани келбетін қалыптастыратын өзара үндес құндылықтар екендігі айтылды. Сондай-ақ ата-ананы құрметтеу, үлкенге ізет көрсету, кішіге қамқор болу, ағайын арасындағы татулық пен бауырмалдық секілді асыл қасиеттердің шариғатта да, қазақ дәстүрінде де ерекше орын алатыны жан-жақты түсіндірілді.

Кездесу соңында жамағат көкейдегі сұрақтарын қойып, рухани тақырыптар төңірегінде пікір алмасты. Жиналған қауым тағылымды насихаттан рухани әсер алып, пайдалы мәліметтерге қанықты.

Іс-шара ақ дастархан басындағы еркін сұхбатпен жалғасып, жамағат арасында бірлік пен бауырластықты нығайтуға сеп болды. Мұндай тағылымды кездесулер ұлттық құндылықтарды дәріптеп, қоғамның рухани тұтастығын қалыптастыруға өз үлесін қосуда.