CMK Group компаниясының демеушілігімен Қарағанды қалалық “Төлеутай ата” мешітінің футбол командасы Қарағанды қаласының жазғы футбол лигасына қатысуын бастады.

Қарағандыда бұқаралық және әуесқой футбол жыл сайын дамып, түрлі лига мен турнирлер тұрақты түрде өткізіліп келеді. Сол қатарға биыл “Төлеутай ата” мешітінің жамағатынан құралған футбол командасы да қосылып, қалалық жазғы футбол лигасында өнер көрсетуді бастады.

Командаға қолдау көрсетіп отырған – CMK Group компаниясы. Демеушіліктің негізгі мақсаты – жастар мен жамағат арасында салауатты өмір салтын насихаттау, бұқаралық спортты дамыту және қоғамдағы бірлік пен ынтымақты арттыру.

Бұл бастама Қарағандыдағы мешіт жамағаттары арасындағы спорттық белсенділіктің артып келе жатқанын көрсетеді. Соңғы жылдары қалада мешіт командаларының қатысуымен түрлі футбол турнирлері мен лигалар жиі ұйымдастырылып келеді, ал бұл жоба сол дәстүрдің жалғасы ретінде қарастырылады.

Жазғы лига барысында команда түрлі деңгейдегі қарсыластармен кездесіп, тәжірибе жинақтауды және жарыста жоғары нәтижеге жетуді мақсат етеді.

Қалалық футбол лигасы аясындағы бұл қатысу өңірдегі әуесқой спорттың дамуына және жастардың спортқа қызығушылығының артуына ықпал етпек.