Қарағанды қалалық «Ар-Рахман» мешітінің имамы Азамат Төлеуханұлы Қарағанды қаласындағы «Әл-Ғаффар» мешітінде жамағатқа арнап ақида пәні бойынша өтіп жүрген дәрістерінің қорытындысы ретінде интеллектуалды сұрақ-жауап кешін ұйымдастырды.

Іс-шараның басты мақсаты – қатысушылардың ислам сенімінің негіздері жөніндегі білімін жүйелеу және тереңдету, діни сауаттылық деңгейін арттыру, сондай-ақ жамағаттың діни дүниетанымын интеллектуалдық тұрғыдан дамыту болды. Бағдарлама барысында ислам сенімінің негізгі қағидаттарына қатысты сұрақтар қойылып, қатысушылар мазмұнды жауаптар берді.

Дұрыс жауап бергендер арнайы сыйлықтармен марапатталды. Бұл тәсіл олардың белсенділігін арттырып, білім алуға деген ынтасын күшейтуге ықпал етті. Кеш соңында жамағат атынан ұйымдастырушыларға ризашылық білдіріліп, осындай форматтағы бағдарламалардың діни бірлік пен рухани ынтымақты нығайтудағы маңызы ерекше екені атап өтілді.

ҚМДБ Қарағанды облысы өкілдігінің баспасөз қызметі