Қарағанды облыстық «Әнет баба» мешітінде ұлттық салт-дәстүр мен ислам құндылықтарын үндестіре насихаттауға арналған «Дін мен дәстүр» бөлмесінің ашылу салтанаты өтті.

Игі шараға Қазақстан мұсылмандары діни басқармасының төрағасы, Бас мүфти Наурызбай қажы Тағанұлы арнайы қатысты.

Аталған бөлме халқымыздың рухани болмысын сақтауға, ұлттық мұра мен асыл дінімізді қатар дәріптеуге бағытталған. 

Мұнда салт-дәстүр мен шариғат үндестігін түсіндіретін кітаптар, көрнекі материалдар мен арнайы жобалар орналастырылып, келушілерге насихаттық жұмыстар жүргізіледі.

Ашылу рәсімі аясында тұсаукесу рәсімі өтіп, Бас мүфти Наурызбай қажы Тағанұлы бір бүлдіршіннің тұсауын кесті.

Қазақтың көне дәстүріне сай арнайы ұлттық дастархан жайылып, салтанатты жиын рухани мазмұнмен жалғасты. 

«Дін мен дәстүр» бөлмесі – мешіт жанындағы тәрбие мен насихат жұмыстарын жүйелеуге арналған маңызды орталықтардың бірі ретінде жұмыс істейді.