Әрине, сауда — бұл тек экономикалық әрекет емес, сонымен қатар адамгершілік пен діни жауапкершілікке толы іс. Ислам дінінде сауда адалдық пен әділдікке негізделуі керек.

Сауда әдептері және мұсылманның жауапкершілігі

Алланың атымен бастаймын:

Алла Тағала Құран Кәрімде:

«Адамдардың мал-мүлкін әділетсіз жолмен жемеңдер» — деп бұйырған (Бақара сүресі, 188-аят).

Бұл аят әрбір мұсылман саудагердің адал болуын, алдамай, әділ сауда жасауын міндеттейді.

Пайғамбарымыз Мұхаммед (с.ғ.с):

«Адал саудагер — пайғамбарлармен, шыншылдармен және шейіттермен бірге болады», — деген (Тирмизи, Бую).

Бұл хадис бізге саудагердің сауапты бола алатынын көрсетеді. Бірақ ол үшін келесі әдептерді сақтауымыз керек:

1. Адалдық пен шыншылдық

Кез келген тауарды сатқанда шын мәлімет беру, кем-кетігін жасырмау — бұл имандылықтың белгісі.

2. Алдамау және қулық жасамау.

Алдап пайда табу уақытша, бірақ оның күнәсі ауыр. Таразыны кем тарту, сапасыз тауарды жақсы қылып көрсету — харам іс.

3. Сатып алушыны сыйлау

Клиент — ризығыңның себебі. Оған жұмсақ сөйлеу, алғысын қабылдау, егер саудаласса, сабырмен қарау — мұсылман әдебі.

4.Сауданың берекесін тілеу

Пайғамбарымыз (с.ғ.с) айтқан:

«Екі адам сауда жасағанда, егер олар шыншыл әрі адал болса, саудаларына береке беріледі» (Бухари, Бую’).

Сауда — табыс көзі ғана емес, Жаратқанның разылығына жету жолы. Сауда арқылы адам өзінің иманын, адалдығын, адамгершілігін көрсете алады.

Алла Тағала баршамызды адал саудагер, шыншыл мұсылман болуға нәсіп етсін! Амин!

Саран қалалық мешітінің имамы Нұржігіт Мұсабеков