Аса қамқор, ерекше мейірімді Алланың атымен бастаймын!

Ислам сөзінің негізгі мағынасы және түп тамыры бейбітшілік, аманшылық деген мағынаны білдіреді. Қасиетті Құрани Кәрімдегі Алла Тағаланың «Салам»  деген көркем есімімен сабақтас десек болады.

Ұлы Жаратушының Жəбірейіл періште (а.с)  арқылы Өзінің сүйікті құлы, соңғы елшісі Мұхаммедке   ﷺ жіберген ең соңғы діні. Ол адам баласына соғыс пен қайғы емес,  тыныштық пен бейбітшілікке және де бақытты өмір сүруге жетелейтін асыл дін.

Қазіргі статистикалық мәліметтерге көз жүгіртер болсақ, шамамен алғанда әлемде 1,5 млрд-қа жуық мұсылмандар өмір сүреді. Бұл көрсеткіш әр минут өткен сайын көбею үстінде. Әрине, бұл барша мұсылмандар үшін қуантарлық жайт болғанымен, оның да бір кем тұстары жоқ емес. Олай деуге бір себеп, асыл діннің түп мақсаты мен негізгі мәнін, шынайы дәмін сезбеген жандардың жат ағым жетегінде кетіп, адасуы. Еліміздің тарихы мен ата-дәстүр салты  мыңдаған жылдар мен ғасырлар бойы Ислам дінімен сабақтасып дамып келеді.

Алайда, қазіргі  уақытта әлемнің көптеген елдерінде  орын алып жатқан бүліктер мен ғаламторда, исламға қатысты таңылып жатқан қара дақтардың Хақ дініміз Исламға  ешбір қатысы жоқ. Себебі, Ислам діні -  терроризм,  экстримизммен, соғыспен, қантөгіспен, зорлық көрсетіп, күштеп жаулап алумен   байланыспайды. Бұның барлығы сауатсыздық пен надандықтың белгісі. Асыл дініміз исламның атын жамылған жандардың адасуының белгісі.

Ұлы тәрбиеші, жалпы адамзат баласының ұстазы Пайғамбарымыз ﷺ  өзінің сахабаларына былай деп айтқан:

لاَ تَتَمَنَّوْا لِقَاءَ الْعَدُوِّ، وَسَلُوا اللهَ الْعَافِيَةَ

«Жаумен кездесуді игі тұтпаңдар, керсінше Алладан амандық сұраңдар»,-деген.

Қасиетті Құрани Кәрімде де осы мәселеге байланысты:

وَقَاتِلُوا فِي سَبِيلِ اللهِ الَّذِينَ يُقَاتِلُونَكُمْ وَلاَ تَعْتَدُوا إِنَّ اللهَ لاَ يُحِبُّ الْـمُعْتَدِينَ

Өздеріңмен соғысқандармен Алла жолында соғысыңдар да шектен шықпаңдар. Негізінен Алла шектен шығушыларды жақсы көрмейді^[4].

Кез-келген адам дінді өзінің қалауымен, таңдауымен дінге толық сенім арта отыра және оны толық танып зерттей отыра, барша ықтиярымен таңдайды. Бұл дегеніміз,   біреуді күштеп оған дінді қабылдату  Ислам дініне жат әрекет.

Мұхаммед пайғамбардың өзі (с.ғ.с.) хадистердің бірінде:

"Ислам жолында сендер ертеңгі күні түрлі елдерге барып, Алланың хикметін жеткізесіздер. Сонда Шариғатқа қайшы келмесе, сол елдердің әдет-ғұрпына, сенім-нанымына құрметпен қарап ардақтаңдар",-деген.

Тура  осы ұстаным арқылы Қазақ жерінде ата-бабамыздың заманынан бастап төселген Ханафи мазхабы асыл дінімізді жергілікті құндылықтарымыз бен салтымызға, дәстүрімізге қарсы қоймай, өзара сабақтастыра отырып ұстануға қолайлы жағдай туғызды. Қазақ даласына діннің дәнін егіп,  халыққа тура жол ашқан,әлі күнге шейін күллі мұсылман үмбеті қастерлеп, бас иетін әл-Фараби, әл-Бұхари, Бейбарыс, Яссауи сынды жауһарлардың есімдері еліміздің тарихында ойып із қалдырған.

Ал, діни-экстремистік ұйым­дардың негізгі мақсаты – ел ішінде бүлік тудырып іріткі салу,елдің берекесі мен тыныштығын кетіріп, тыныш отырған көршілес бейбіт елдер мен діндес адамдарды арандату. Дегенмен, қазіргі уақытта осындай жат әрекетпен арандатушылардың негізгі мүддесі барша әлемге тайға таңба басқандай белгілі болды.  «Жиһад» сөзін қате түсініп, жат ағым жетегінде кеткен қазақтың қара домалақ балалары мен қара көз қарындастарымыздың өмірі қыршыннан қиылды. Сондықтан елімізде қазіргі уақытта жат ағымның жетегінде кетпеу үшін діни оқу орындары, медреселер ашылып, арнайы дін мамандары халыққа, жастарға дұрыс діни білім беріп, қарқынды жұмыс жасап жатыр. Себебі, еліміздің ертеңі болатын бүгінгі жастарымыздың діннен дұрыс білім алуларына айрықша көңіл бөлінгені жөн. Осы орайда еліміздің барлық елді мекендерінде, облыстар мен аудан, ауылдарда теолог ғалым­дарымыз белсенді үгіт насихат жүргізуде.               

Пайғамбарымыз ﷺ  меңзеген нағыз «жиһад» сөзінің түп мағынасы – адамның өз нәпсісімен күресуі. Өзін тәрбиелеп, бойындағы жат қылықтарынан арылуы, қызғаншақтық, тәкәппарлық, көреалмаушылық секілді лас сипаттармен күресуі.

Пайғамбарымыздан сахабалары:  «Уа, Расулуллаһ, «үлкен жиһад» деген не?»- деп, сауал қойғанда, Пайғамбарымыз (с.ғ.с): «Ол — өз нәпсіңмен күрес»,- деген.

Жүрегі Алла деп соққан әр мұсылман өзін тек көркем мінез бен жақсы амалды жүзеге асыруға тәрбиелеуі керек. Міне, сонда ғана ел іргесінен тыныштық, босағасынан береке мызғымайды. Алла Тағала баршамызға тура жолдан таймай, нағыз мүминнің ғұмырын кешуді нәсіп етсін. Амин!

Ибраев Әсет

Шахтинск қалалық «Нұр» мешітінің имамы