Осакаров аудандық мешітінің ұстазы Ақбота Қайратқызының ұйымдастыруымен әйел-қыздарға арналған «Жас толқын – дала семинары» өтті.

Семинар барысында қатысушылар түрлі спорттық ойындарға қатысып, топтарға бөлініп өзара бақ сынасты. Сонымен қатар қазақтың ұлттық ойындарының бірі – «Бес тас» ойыны ойнатылып, ұлттық құндылықтарды дәріптеуге ерекше көңіл бөлінді.

Іс-шараның басты мақсаты – жамағат арасында ауызбіршілік пен татулықты нығайту, өзара сыйластық пен ынтымақтастықты арттыру болды.

Шара аясында Ақбота Қайратқызы қатысушыларға бірлік пен ынтымақтың маңызы туралы уағыз-насихат айтып, қоғамдағы татулықтың, өзара қолдаудың және бауырмалдықтың орны ерекше екенін түсіндірді. Семинар соңында қатысушылар көтеріңкі көңіл-күймен тарқасып, ұйымдастырушыларға алғыстарын білдірді.