ҚМДБ төрағасы, Бас мүфти Наурызбай қажы Тағанұлы Діни басқарманың кеңейтілген Төралқа мәжілісінде барша дін қызметкеріне бағдарламалық баяндамасын жолдап, мүфтият қызметінің жеті бағытын айқындаған болатын. Осы жеті бағыттың бірі – оқу-ағарту және кадрлық әлеует болып табылады.
 
Оқу-ағарту және кадрлық әлеует бағыты бойынша жұмыс жоспарын пысықтау мақсатында Теміртау қаласының бас имамы Естай Айтуғанұлының төрағалығымен жиналыс өтті. Алқалы жиынға шаһарға қарасты мешіттердің имамдары, ұстаздары және қызметкерлері қатысты.
 
​Алғы сөзді алған Естай Айтуғанұлы жергілікті мешіттердің жанындағы сауат ашу курстарының жұмысын жандандыру, жаңа пәндер бойынша дәрістер оқу, санитарлық-эпидемиологиялық жағдайға байланысты дәрістерді онлайн форматта өткізуге көңіл бөлу керектігін айтып өтті. Сонымен қоса, кадрлық әлеует мәселесін тілге тиек етіп:
 
«Дін қызметкерлерінің біліктілігін тек діни тұрғыдан емес зайырлылық, заңнамалық тұрғыдан арттыруға көп көңіл бөлуіміз қажет. Оқу-ағарту және кадрлық әлеует бағытындағы жұмыстарға ерекше назар аударуымыз керек», деп айтты.
 
Жиналыс соңында бас имам дін қызметкерлеріне бірқатар тапсырмалар беріп, нақты міндеттер жүктеді.

ҚМДБ – Қарағанды облысы бойынша баспасөз қызметі