Бұқар жырау ауданына қарасты Байқадам ауылдық «Ғыйзат қажы» мешітінде «Дін мен дәстүр» бағыты аясында сәбиге азан шақырып, есім қою рәсімі өтті.

Игі шара барысында мешіт имамы Орынбай Ерлан жаңа туған сәбидің оң құлағына азан, сол құлағына қамат айтып, мұсылманшылық дәстүрге сай есімін қойды.

Имам азан шақырып ат қоюдың мұсылман өміріндегі маңызды сүннет амалдарының бірі екенін айтып, балаға көркем мағыналы есім таңдаудың мәніне тоқталды. Сонымен қатар жас ата-анаға перзентті имандылыққа, ізгілікке және ұлттық құндылықтарға тәрбиелеудің маңыздылығы жөнінде насихат айтты.

Шара соңында сәбидің аман-есен өсіп, еліне қызмет ететін саналы ұрпақ болуын тілеп, отбасы мүшелеріне ақ батасын берді.