Қарағанды қалалық “Әл-Ғаффар” мешітінде ұстаз Бақыт Амантайқызының ұйымдастыруымен 3 пен 12 жас аралығындағы бүлдіршіндер мен жасөспірімдер арасында Алла Тағаланың 99 көркем есімін жатқа айтудан сайыс өтті.

Іс-шараның негізгі мақсаты – өскелең ұрпақтың бойына имандылық пен рухани құндылықтарды сіңіру, Жаратушының көркем есімдерін ұлықтау арқылы олардың жады мен білімге деген қызығушылығын арттыру.

Сайыс қатысушылардың жас ерекшеліктеріне қарай бірнеше топқа бөлініп өткізілді. Кіші топтағы (3–5 жас) бүлдіршіндер «Әл-Рахман», «Әл-Рахим» есімдерін мәнерлеп айтып, көрермендердің ықыласына бөленді. Орта топ (6–8 жас) қатысушылары есімдерді жатқа айтып қана қоймай, олардың мағыналарын түсіндіруге талпыныс жасады. Ал жоғары топтағы (9–12 жас) жасөспірімдер 99 көркем есімді толық әрі мүдірмей айтып, өз білімдерін жоғары деңгейде көрсетті.

Қазылар алқасы қатысушылардың айту мәнеріне, дыбыстарды дұрыс шығаруына (тәжуид) және жатқа білу деңгейіне ерекше мән беріп, әділ бағасын берді.

Сайыс қорытындысында барлық қатысушыларға арнайы сертификаттар мен ынталандыру сыйлықтары табысталды. Шара соңында ата-аналар мешіт ұжымына осындай тәрбиелік мәні зор игі іс ұйымдастырғаны үшін алғыстарын білдірді.

Бұл кеш тек жарыс емес, нағыз рухани мерекеге айналды. Балалардың жүзіндегі қуаныш пен жүрегіндегі иман нұры – ел болашағының жарқын кепілі.