Темір ауданына қарасты Кеңқияқ ауылында сыйымдылығы 1000 адамдық алғашқы мешіт тұрғызылуда. Бұған дейін ауылда мешіт болған емес. Жергілікті жамағат жұма намаздарына Саркөл және Шұбарши ауылдық мешіттеріне қатынайтын.

Бүгінде мешіттің екінші қабаты қалануда. Ғимараттың сырты қызыл кірпішпен қапталып, құрылыс қызу жүруде. Мешіт салуға демеушілік етуші кәсіпкер азаматтар жуырда осында ауыл халқына ас берді. Ауыл тұрғындары қайырымды жандарға алғысын жаудырып, ақсақалдар игі істің сәтті аяқталуын тілеп, бата берді. 

Кеңқияқтағы намазхан жамағаттың саны 100-ден асып жығылады. Алла қаласа, Кеңқияқтағы алғаш салынған мешітте азан шақырылып, ауыл азаматтары бір сапта тұрып намаз оқитын күн де алыс емес. Құлшылық үйін тұрғызушы қайырымды жандардың Алла сауабын еселеп, жәннаттан жай бұйыртқай!