Орал орталық мешітінің ұстазы Ринад Акимовтың ұйымдастыруымен Атырау  «Жас өрендері» қоғамдық қайырымдылық қорының қолдауымен аталмыш мешіттің сауат ашу курсының шәкірттері мен балғын сәбилер  табиғат аясына шығып, бір күндік спорттық шара өтті.

Мешіттің білімді шәкірттері Теректі ауданы, Подстепное ауылындағы  «Ақжол» саяжай жағасында спорттық шараларға белсенділік танытты. Табиғат аясындағы спорттық шараға облыстық орталық мешітінің бас  имамы Еркебұлан Қарақұлов арнайы қатысып, «Ауызбіршілік» жайында уағыз айтып, бірлесе еңбек етуге, білім алуға шақырды.

Келген қауым бас имам Еркебұлан Ыбырайымұлы мен орталық мешітінің ұстазы Ринад Акимовқа ойландырып жүрген  сауалдарын жолдап, тұщымды жауаптарын алды.

Жалынды жастар гір тасын көтеріп,  топ болып  арқан тартысып, шараны қыздыра түсті.

Шара соңында   жеңімпаздарға арнайы дипломдар мен бағалы сыйлықтар табыс етілді.