ҚМДБ Қарағанды облысы бойынша «Жастар ісі» бөлімінің ұйымдастыруымен маусым айының  20-нан  шілде айының  20-сы аралығында өткен жасөспірімдер арасындағы жазғы діни сауат ашу курсы өз жұмысын аяқтады. Курсты тәмамдаған бүлдіршіндерге Қарағанды облыстық «Әнет баба» мешітінің өкіл имамының қызметін атқарушы Кәрсембай Дархан Асылтайұлы арнайы сертификаттар мен арнайы сыйлықтар  табыстап, талапты бүлдіршіндерге жылы лебізін білдірді. Жылдағы дәстүр бойынша ұйымдастырылған жазғы оқу лагерінде мектеп жасындағы балаларға ислам әдебі, иман негіздері, Құран әліппесі секілді пәндер жүргізіліп, исламның алғышарттарын үйретті. Мектеп оқушыларының жаз маусымын пайдалы өткізіп әрі ислам діні жайлы таным көкжиегін кеңейту мақсатында өткен жазғы лагердің ең кішкентай шәкірті   5 жаста болса, ең үлкені 13 жаста. Жазғы сауат ашу курсы аясында мешітке келіп, сабақ алған қыз балалар мен ұлдардың жалпы саны 60 –тан асты. Сондай-ақ, шәкірттер сауат ашу, тәрбиелік сағаттарымен қоса  көрме ұйымдастырып, өздерінің қолдарынан шыққан әртүрлі суреттер мен қолөнер бұйымдарын ұсынды. Балалардың еңбектерін мешітке келуші жамағатпен қоса қонақтар да тамашалады. Ата аналар разылықтарын білдіріп, мешіт ұжымына алғыстарын білдірді.Сонымен бірге балалар арасында Құран, дұға және хадис жарыстары өтіп, белсенді қатысып орын алған шәкірттер  арнайы сыйлықтармен марапатталды.