Қарағанды облысының бас имамы Естай Айтуғанұлы Әлихан Бөкейхан атындағы Теміртау орталық мешітінде жергілікті дін қызметкерлерімен арнайы жиын өткізді.

Басқосуға облыстық «Әнет баба» мешітінің бір топ ұжымы мен Әлихан Бөкейхан атындағы Теміртау орталық мешітінің бас имамы Бейбіт Бақытжанұлы бастаған құлшылық үйінің қызметкерлері қатысты.

Жиында жергілікті діни ағартушылық пен мешіт істері және Қазақстан мұсылмандары діни басқармасы бекіткен жеті бағыт аясында қызмет атқару мәселелері сөз етілді.

 «Сіздердің әрқайсыңыз асыл дінімізге қызмет етіп жүрсіздер. Алла Тағала осы сауапты істен біздерді айырмасын. Осы мешітте жүріп қызмет ету арқылы еліміздің бүкіл мешіттеріне үлес қосудасыздар. Бұл түптеп келгенде бүкіл дін үшін қосқан үлестеріңіз болмақ. Сіздерді Алла разылығы жолында білек сыбана бірге қызмет атқаруға шақырамын», деді облыс бас имамы өз сөзінде.

 Жиын соңында ақсақалдар ақ батасын беріп, қызметке жаңа тағайындалған облыс бас имамы Естай Айтуғанұлына сәттілік тіледі.

ҚМДБ-ның Қарағанды облысы бойынша баспасөз қызметі