Күннің аптап ыстығына қарамастан 29 күн бойы ауыз бекіткен күллі мұсылманның Ораза Айт мерекесін амандықпен күтіп алуының өзі зор қуаныш. Әрбір мұсылман баласына Ораза айтының орны бөлек әрі ыстық екені анық. 12 айда бір келетін, көпшілік мәре-сәре болып тойлайтын Айттың алғашқы күнін Қарағанды облыстық орталық мешіті ұлттық нақышта дүбірлетіп атап өтті.
Таңғы Айт намазының алдында Қарағанды облысының әкімі Нұрмұхамбет Қанапияұлы Әбдібеков Қарағанды жұртын Ораза Айт мерекесімен құттықтап, дінімізге күш-қуат, елімізге амандық тіледі. ҚМДБ-ның Қарағанды өңірі бойынша өкіл имамы Өмірзақ қажы Қазкенұлы жиналған көпшілік алдында Бас мүфти Ержан қажы Малғажыұлы хазіретінің құттықтауын жеткізді. Өкіл имам өзінің ақжарма тілектерінен соң, мешіттің ұйымдастыруымен өтетін мерекелік іс-шараның бағдарламасымен таныстырып, барша жамағатты мешіт алаңына шақырды. ҚМДБ бекіткен «Дін мен Дәстүр» жылы аясында мешіт ауласында киіз үйлер тігіліп, ақсақалдарымыз бен ақ жаулықты аналарымыз және белгілі зиялы қауымдар ақ дастарханға шақырылды. Ұлттық ойындар бойынша додалы ойындардың ішінде арқан тартып жарысуда жігіттеріміз топ-топқа бөлініп күш сынасса, найза лақтырудан қатысушыларымыз өз мергендіктерін көрсетті. Қазақша күресте нағыз палуандар анықталып жатса, басқалары ауыр гір тасын еркін көтеріп, көрермен таңдайын қақтырды. Кіл жүйріктерге мешіт ұжымы марапаттау қағаздары мен бағалы сыйлықтарды үлестірді. Халық бар ынта-жігерімен қатысушыларға жанкүйер болып, дүбірлеп өткен қызу тойдың куәсі болып қайтты.

ҚМДБ-ның Қарағанды өңірі бойынша баспасөз қызметі

[gallery size="medium" link="file" ids="17894,17895,17896,17897,17898,17899,17900,17901,17902,17903,17904,17905,17906,17907,17908,17909,17911,17912,17913,17914,17915,17916,17917,17918,17919,17920,17921,17922,17924,17925,17926,17927,17928,17929,17930,17931,17932,17933,17934,17935,17936,17937,17938,17939,17940,17941,17942"]